Vllaznia e volejbollit të femrave e ka fituar edhe ndeshjen e tyre eliminatore në Kupën e Shqipërisë dhe në grupin B, së bashku me Tiranën, është në gjysmëfinale. Por e djeshmja ka qenë një ndeshje për t’u harruar për shkodranet, që duket pasi kishin fituar me Partizanin e kishin shkallën e euforisë në maksimum.
Thënë ndryshe Vllaznia e djeshme ndryshonte si “nata me ditën” me atë që ka paraqitur ndaj Partizanit, teksa ka pasur më shumë dëshirë e vullnet për të fituar. E nëse ka fituar pastër 3-0 ka ardhur nga fakti se Flamurtari është për mëshirë. Një ndeshje ku të dyja palët kanë shumë humbur shumë gjuajtje e për këtë vlen statistika.
Në tre sete Flamurtari ka shënuar 42 pikë prej të cilave 22 pikë i ka shënuar vetë, kurse 20 kanë ardhur nga gabimet e shkodraneve. Në krahun tjetër Vllaznia në tre sete ka shënuar 75 pikë prej të cilave 49 vetë, kurse 26 kanë ardhur nga gabimet e vlonjateve, që duket se për shkak të mefshtësisë në kolektiv kanë falur një set.
Duke u ndalur tek ndeshja, Vllaznia në setin e parë është gjatë gjithë kohës në epërsi: 3-8, 5-12, 10-16, 11-18, 19-25. E njëjta gjë në setin e dytë: 3-5, 5-8, 10-16, 14-19, 14-25. Seti i tretë nuk ka shumë histori, sepse Vllaznia, që ka aktivizuar dhe lojtaret e stolit, ka kryesuar 5-8, 7-16 dhe në fund 9-25.
Flamurtari – Vllaznia 0-3
(19-25, 14-25, 9-25)
Flamurtari: Çaushaj, Memetaj, Petritaj, Isakaj, Mezinaj, Mali (L), R. Isakaj / Malaj, Tafili. Trajner: T. Driza
Vllaznia: Molla, Picaku, Peteza, Zhivanaj, Koçeku, Qershia, Vistaraj (L) / Kiri (L), Dodani, Rranza. Trajner: S. Goga
Gjyqtarë: A. Shehu, E. Papamihali (Tiranë)
Kupa e Shqipërisë
Volejboll – Femra
Kalendari i fazës çerekfinale
Grupi B
(“Fahrie Hoti” – Tiranë)
Të martën:
Tirana – Flamurtari 3-0
Partizani – Vllaznia 1-3
Të mërkurën:
Tirana – Partizani 3-0
Flamurtari – Vllaznia 0-3
Të enjten:
Vllaznia – Tirana ora 15:00
Partizani – Flamurtari ora 16:30
Renditja
Nr. Skuadra N. F. H. Setet Pikë
- Tirana 2 2 0 6-0 6
- Vllaznia 2 2 0 6-1 6
- Partizani 2 0 2 1-6 0
- Flamurtari 2 0 2 0-6 0
