Duket se dje ka qenë dita e volejbollit shkodran. Pas fitores të vajzave kuqeblu në mbrëmjen e djeshme në Sallën Sportive “Farie Hoti” në kryeqytet ndaj Partizanit, vetëm në një tjetër mjedis sportiv të Tiranës, tashmë Pallatit i Sportit “Asllan Rusi”, djemtë shkodran arrijnë një tjetër sukses. Kanë mundur Farka Volejin në ditën e parë të fazës eliminatore të grupit A të Kupës së Shqipërisë, thellësisht dhe pastër 3-0, ndërsa kështu janë hakmarrë për atë humbje të fazës së parë në kampionat me të njëjtin rezultat.
Qafarenat, Rrashketa, Çekini, Jukni, Miloti e të tjerë e kanë sfiduar Farkën në çdo drejtim, ndërsa kjo skuadër është duke kaluar momente të vështira. E vërteta është se në harkun kohor të gati dhjetë ditëve ka luajtur tre ndeshje të forta, të cilat për fatin e keq të skuadrës së Dritan Bardhit nuk kanë shkuar mirë. Sepse pas tre humbjeve radhazi në kampionat, 2-3 me Teutën, 1-3 me Studentin dhe 0-3 me Tiranën, tashmë ka ardhur dhe kjo humbje në Kupën e Shqipërisë ndaj Vllaznisë.
Me përjashtim të Koçit, i cili mundohet të bëjë maksimumin me gjuajtjet e tij, e gjithë pjesa tjetër e skuadrës duket se është plotësisht në hije. E kjo që nga organizatori Deliu, tek shuteri Qepa, apo dhe Bajrami, Nimani, Metani e libero Bërdufi. Vllaznia dje nuk ka lëshuar për asnjë moment, ndërsa pikë pas pike ia ka dalë të jetë fituese e ndeshjes. Në setin e parë Vllaznia ka fituar disi me vështirësi 25-22, por në të dytën gjithçka ka qenë më e lirë për shkodranët, sepse kanë fituar 25-17.
Edhe i treti është me vështirësi për Vllazninë, por që gjithsesi të besuarit e Artan Kalajës ia kanë dalë. 25-21 dhe krejt ndeshja 3-0. Për t’u evidentuar është fakti se luajtja e këtyre ndeshjeve në ora 19:00 në sallën kryesore të Pallatit të Sportit “Asllan Rusi” është jashtë çdo mundësie për t’i kërkuar maksimumin lojtarëve. Sepse fitojnë ata që janë të fortë dhe rezistentë ndaj të ftohtit, ndryshe ngrin dhe del jashtë parketit. Përtej kësaj Vllaznia ia ka dalë të jetë fituese e sot pret ndeshjen me Studentin për të qenë e sigurtë në kalimin në gjysmëfinalen e Kupës së Shqipërisë.
Vllaznia – Farka Voleji 3-0
(25-22, 25-17, 25-21)
Kupa e Shqipërisë
Volejboll – Meshkuj
Kalendari i fazës çerekfinale
Grupi A
(“Asllan Rusi” – Tiranë)
Të martën:
Vllaznia – Farka Volej 3-0
Studenti pushim
Të mërkurën:
Studenti – Vllaznia ora 19:00
Farka Volej pushim
Të enjten:
Farka Volej – Studenti ora 19:00
Vllaznia pushim
Renditja
Nr. Skuadra N. F. H. Setet Pikë
- Vllaznia 1 1 0 3-0 3
- Farka Voleji 1 0 1 0-3 0
- Studenti 0 0 0 0-0 0
