Tirana ka nxjerrë “fishek Flamurtarin në ndeshjen e parë të grupit A të fazës eliminatore të Kupës së Shqipërisë, ndërsa përballë ka pasur një kundërshtar që vazhdon të mos jetë në formën që pritet. Të besuarat e Adrian Gorenxës edhe duke shfrytëzuar përvojën e Klejda Shkurtit, Ergysa Bllokut, Esmeralda Tucit dhe Klonarda Nezajt, pa lënë mënjanë organizimin e Hoxhës dhe sulmet e Pirrës, e kanë vënë që në fillim nën kontroll ndeshjen.

5-1, 8-3, 16-9, 20-10 dhe rrjedhimisht seti i parë ka përfunduar 25-11. Në të dytin ka hapësira edhe për lojtaret e stolit që nga Romina Meta e deri tek Agolli, Sheku e Llaka. Blloku nuk përmbahet në lojën e saj e duke gjetur “shesh” e ka bërë “përshesh” Flamurtarin, që për asnjë çast nuk arrin të reagojë. 8-1, 9-1, 16-1, 20-4 dhe në fund 25-7. Edhe pse trajneri Driza mundohet me anë të pushimeve të orientojë skuadrën e tij, sërish Tirana nuk fal.

8-4, 12-5, 16-6, 19-8, 25-10 dhe në harkun kohor të një ore bardheblutë kanë mbaruar punë me Flamurtarin, thellësisht 3-0. Pikëshënuesja më e mirë e ndeshjes është Blloku i Tiranës me 17 pikë. Në bllok janë fituese Nezaj, Hoxha, Pirra e Tiranës me një mur rezultativ. Kurse në shërbim janë fituese Shkurti e Pirra të Tiranës dhe Memetaj e Flamurtarit me tre të sakta, pasuar nga Agolli e Tiranës me dy të sakta.

Në total në tre sete Tirana ka shënuar 75 pikë prej të cilave 59 vetë, kurse 16 pikë janë nga gabimet e Flamurtarit. Në krahun tjetër Flamurtari në tre sete ka realizuar 28 pikë prej të cilave 15 pikë vetë e 13 janë gabimet e bardhebluve. Por ajo që mbetet është fakti Tirana edhe përballë kundërshtareve të pafuqishme demonstron cilësinë dhe forcën e saj në rrjetën shqiptare.

Tirana – Flamurtari   3-0

(25-11, 25-7, 25-10)

Tirana: Shkurti, Sejfullai (L), Blloku, Tuci, Nezaj, Hoxha, Pirra / Agolli, R. Meta, Shehu, Llaka. Trajner: A. Gorenca

Flamurtari: Petritaj, Isakaj, Mali (L), Mezinaj, Çaushaj, R. Isakaj, Memetaj. Trajner: T. Driza

Gjyqtarë: A. Nuri (Durrës), E. Papamihali (Tiranë)

Kupa e Shqipërisë

Volejboll – Femra

Grupi B

(“Fahrie Hoti” – Tiranë)

Të martën:

Tirana – Flamurtari              3-0

Partizani – Vllaznia             1-3

Të mërkurën:

Tirana – Partizani                ora 16:00

Flamurtari – Vllaznia           ora 18:00

Të enjten:

Partizani – Flamurtari          ora 16:00

Vllaznia – Tirana                  ora 18:00

Renditja

Nr.       Skuadra         N.        F.         H.        Setet               Pikë

1. Tirana 1          1          0          3-0                  3
2. Vllaznia 1          1          0          3-1                  3
3. Partizani 1          0          1          1-3                  0
4. Flamurtari 1          0          1          0-3                  0