Tirana e ka luajtur derbin me Partizanin, mbrëmë në Sallën Sportive “Farie Hoti” në kryeqytet, sa për sy e faqe. Sepse jo vetëm që e ka dominuar dhe e ka fituar atë, por kështu i ka dhënë kohë trajnerit Avrami që ta shoqërojë dhe ta drejtojë përsëri nga jashtë stolit Kamza Basket për femra në Elbasan. Një ndeshje e cila nuk është se ka pasur një sallë të mbushur plot, por që ka pasur edhe praninë e krerëve më të lartë të Federatës Shqiptare të Basketbollit.

Që do të thotë se edhe pse në këmbë e të mbështetur pas murit, Presidenti Avni Ponari dhe Sekretari i Përgjithshëm i institucionit më të lartë të koshit shqiptar, Korab Llazani, shoqëruar nga vëzhguesi Arben Kaçurri, kanë qenë në këtë ndeshje. Tirana e ka dominuar që në pjesën e parë, teksa ka fituar 25-15. Më pas gjithçka ka ardhur duke u thelluar, ndërsa bardheblutë kanë fituar 14-6 edhe 10-minutëshin e dytë dhe kanë thelluar kështu në 39-21.

Ka një farë përmirësimi të lojës së Partizanit që mbështetur tek Florian Ismeti, Selimaj dhe Tegu, por dhe Pylla arrin ta fitojë pjesën e tretë 15-16 dhe të ngushtojë deri në 54-37. Por vetëm kaq. Tirana të gjithë lojtarët e stolit, madje dhe më të riun Nazareno Koko, dhe fiton pjesën e katërt 22-14 dhe krejt ndeshjen 76-51. Ajo që duhet theksuar është dhe fakti se trajneri i Partizanit, Elvis Ismeti, ka qëndruar nga pas stolit, së bashku me inspektorin e të kuqve, Elton Stafa.

Kjo sepse nuk është paguar gabimi teknik i marrë në ndeshjen ndaj Teutës. Pasi gjendja financiare e Partizanit nuk është aq e shëndoshë sa të mund të mbahet barra e gabimeve teknike. Përtej kësaj Kamza Basket, Vllaznia e Tirana janë “kampionët” e përbashkët të dimrit në basketboll për meshkuj, çka dëshmon për rivalitetin që premton ky sezon në gjysmën e tij të tij dhe në fazën finale.

Tirana – Partizani                76-51

(25-15, 14-6, 15-16, 22-14)

Kampionati Kombëtar

i Basketbollit – Meshkuj

Superliga

Java e 10-të

(9-11 dhjetor 2015)

Të mërkurën:

Kamza Basket – Teuta        76-60

Të premten:

Flamurtari – Vllaznia           55-74

Tirana – Partizani                76-51

Renditja

Nr.       Skuadra                     N.        F.         H.        Psh-Pp           Pikë

1. Kamza Basket 10        8          2        763-618         18
2. Tirana             10        8          2        786-669         18
3. Vllaznia             10        8          2        738-636         18
4. Teuta                         10        4          6        738-743         14
5. Flamurtari             10        2          8        645-798         12
6. Partizani             10        0          10        576-682         10