Për gati një orë kampionët në fuqi të volejbollit të femrave kanë mbaruar punë me shkodranët, atje ku Gurabardhi ka aktivizuar dhe të rejat, ndërsa janë dalluar Hasku e Picaku. Barleti Volej i Hasan Gurabardhit e ka nxjerrë “fishek” Vllazninë, teksa e ka mundur pastër dhe thellësisht 3-0. Diferencat kanë qenë të mëdha në fushën e lojës, aq sa në setin e parë Xheka ka ndejtur në shërbim për gati gjysmën e setit, sepse herë me pikët e saj e herë me pikët e Bicit, Brahos, Xhixhës, Tucit, Barleti Volej ka thelluar në 16-0.

Përtej ndonjë vrulli të shkodraneve seti i parë ka përfunduar 25-5. Parë kështu, Gurabardhi vendos të aktivizojë rezervat, atje ku janë dalluar Hasku e Picaku. Vllaznia merr frymë, sepse arrin të shënojë disa pikë më shumë, por jo deri në shkallën e përmbysjes. 8-5, 14-6, 16-10 dhe në fund 25-20. Seti i tretë është krejtësisht pa histori, sepse Barleti Volej ka kryesuar gjatë gjithë kohës derisa e ka mbyllur atë 25-10 dhe të gjithë ndeshjen 3-0.

Pikëshënuesja më e mirë e ndeshjes është Bici me 12 pikë, ndjekur nga Xhixha me 11 pikë dhe Braho me 10 pikë. Në bllok ka dalë fituese Picaku me tre mure të sakta, kurse në shërbim Xheka e Braho me katër të sakta. Në total Barleti Volej nga 75 pikë, 65 i ka realizuar vetë, kurse dhjetë kanë ardhur nga gabimet e shkodraneve. Kësisoj edhe pas javës së gjashtë, Barleti Volej vazhdon të kryesojë me pikë të plota dhe me asnjë set të humbur. Që do të thotë se vazhdon të ketë hijen jo vetëm të një kampioneje në fuqi, por dhe të një skuadre që gjatë gjithë sezonit është e aftë të marrë trofe.

Barleti Volej – Vllaznia        3-0

(25-5, 25-20, 25-10)

Barleti Volej: Braho, Xhixha, Bici, Xheka, Tuci, Thaka, Fagu (L) / Hasku, F. Picaku, Brati, Xhelilaj, Zeqirllari (L). Trajner: H. Gurabardhi

Vllaznia: Sh. Molla, L. Picaku, Peteza, Zhivani, Koçeku, Vistaraj, Kiri (L) / A. Molla, Rranza. Trajnere: S. Goga

Gjyqtarë: A. Telo, E. Kurti (Tiranë)

Kampionati Kombëtar

i Volejbollit – Femra

Grupi A1

Java e 6-të

(5 dhjetor 2015)

Barleti Volej – Vllaznia        3-0

Elbasani – Teuta                  0-3

Partizani – Flamurtari          3-1

Skënderbeu – Tirana          0-3

Renditja

Nr.       Skuadra         N.        F.         H.        Setet               Pikë

1. Barleti Volej 6          6          0          18-0                18
2. Tirana 6          6          0          18-0                18
3. Skënderbeu 6          4          2          12-8                11
4. Teuta 6          3          3          9-10              9
5. Partizani 6          3          3          9-11              9
6. Vllaznia 6          1          5          6-15              4
7. Elbasani 6          1          5          4-15              3

8.       Flamurtari      6          0          6          1-18              0