Peshëngritja shqiptare e ka kthyer çështjen e pjesëmarrjes së saj në Kampionatin Botëror në Hjuston të Shteteve të Bashkuara të Amerikës në një “çil e mbyll” apo “ikim, s’ikim”. Nëse në ditën e zhvillimit të Kampionatit Kombëtar, më 16 tetor, Presidenti i Federatës Shqiptare të Peshëngritjes, Elez Gjoza, pati deklaruar se do të merret pjesë, vetëm tre ditë më vonë në studiot e TVSH-së, Sekretari i Përgjithshëm Agron Haxhihyseni, pat cituar vendimin e kryesisë se nuk do të merret pjesë.
Sepse, sipas tij, në Botërorin e Hjustonit nuk arrihen pikët e kualifikimit për në Lojërat Olimpike “Rio de Zhaneiro 2016”, siç mund të merren në Evropianin e Norvegjisë në prill të vitit të ardhshëm. Pasi janë 75 pikë për t’u rikuperuar që nga rastet e dopingut të Botërorit të Kazakistanit vitin e kaluar. E megjithatë dje në Ministrinë e Arsimit dhe Sportit janë deklaruar emrat e atyre që do të marrin pjesë, të cilët janë Emanuel Lushi i peshës 62 kg, Briken Calja i peshës 69 kg dhe Erkand Qerimaj i peshës 77 kg.
Trajnerë do të jenë Zef Kovaçi dhe Leonard Toska. Por ajo që bën habinë është fakti se Calja e Qerimaj janë kthyer në peshat e tyre të dikurshme, ndonëse janë të dy 77 kg. Gjithsesi e shkuara në Botëror, hezitimi dhe dyshimi “ikim, s’ikim” s’është kaq e thjeshtë vetëm me idenë e mosmarrjes së pikëve. Sepse përtej dënimit të sportistëve për rastet e dopingut, Shqipëria ka një çengel në të cilin është varur fort, gjoba prej 50.000 eurosh.
Është marrë pjesë në Evropianin e moshave edhe sepse gjithnjë është premtuar se do të shlyhet kjo gjobë, por në Botëror mund të jetë çështje tjetër. Gjithsesi kur ende nuk kemi vendosur se çfarë do të bëhet me kandidaturën e marrjes së Botërorit 2018, me dyshimin “ikim, s’ikim”, Shqipëria i ka bërë gati tre sportistë për në Hjuston të Shteteve të Bashkuara të Amerikës.
