Vllaznia shpallet “kampione” në boks për të 20-ën herë. Anxhelo Merkohasani i Tiranës shpallet boksieri më i mirë i garës së të rriturve që për tre ditë mbushi plot Pallatin e Sportit në Shkodër. Kështu, Vllaznia e Shkodrës është shpallur “kampione” e Shqipërisë në boks për vitin 2015. Kurorëzimi është bërë mbrëmjen e së dielës në Pallatin e sportit “Qazim Dervisji”të Shkodrës përmes një atmosfere shumë festive dhe sportive. Djemtë e boksit shkodran, të drejtuar me plot aftësi dhe profesionalizëm nga trajneri i tyre pasionant, Zef Gjoni, bënë realitet atë që kishin ditë që e premtonin publikisht në media.
Gëzimi bëhet më i madh kur titulli i sivjetem është i 20-ti jubilar që kuqeblutë e arrijnë në 24 kampionate të boksit të rilindur pas viteve 1990-të. Për të mbërritur tek momenti i marrjes në dorëzim të trofeut Vllaznisë iu desh të djersijë jo pak gjatë dy ditëve të para eliminatore të kampionatit. Ka mbërritur në ditën e tretë finale me një hap më përpara se rivalja direkte, Tirana, e cila, jo rastësisht, por për vlerat e boksit shkodran, drejtohet nga një ish-kampion i nderuar i Vllaznisë si Sead Bushati, së bashku me kolegun e tij Skënder Kurti.
Dhe kjo diferencë e dy ditëve të parë arriti të ruhej nga kuqeblutë edhe në finalet e dites së trete, ku me tre kampionë individuale si Arjon Kajoshi, Kristian Demaj dhe Nelson Hysa, kundrejt dy të bardhebluve Anxhelo Markohasani dhe Alban Beqiri, arrin të shpallet kampione e Shqipërisë. Përkatësisht, bazuar në pikëzim, Vllaznia grumbulloi 26 pikë përkundër 21 të Tiranës duke lënë në vend të trete Teutën me 13 pikë, e cila nga ana e saj nxori edhe ajo dy kampionë kombëtarë, Nurja dhe Vrapi. Dinamo, Flamurtari dhe ekipi privat “Arena” arriten të nxjerrin nga një kampionë individual me protagonistë Taulant Zajmin, Krenar Zenelin dhe Albi Sorrës.
Përpos kampionëve dhe nënkampionëve individual që konkuruan në diten e tretë finale, në suksesin e Vllaznisë kontribuan edhe boksierët e tjere, Kristian Shytani, Ardit Agon, Gëzim Jakun, Ronildo Piranin, Pal Ndrevaten, Marjan Vashjen. Në ceremoninë e organizuar në mbyllje të aktivitit, krahas ekipit kampion Vllaznia dhe boksierit më të mirë Anxhelo Merkohasani, u nderuan me kupa personale edhe Klevis Vrapi i Teutes si boksieri më teknik, Arjon Kajoshi i Vllaznisë boksieri i perspektives dhe Taulant Zajmi i Dinamos, boksieri më luftarak.
