Sot finalet e kampionatit kombëtar të boksit për të rritur që do të shënojë dhe fundin e aktivitetit treditor në Pallatin e Sportit “Qazim Dervishi” në Shkodër. Edhe dita e dytë e Kampionatit Kombëtar të Boksit për të rritur, veprimtarisë që po zhvillohet në Pallatin e Sportit “Qazim Dervishi” të Shkodrës, nuk ka kaluar pa emocione. Sërishmi në ring ballafaqimet më interesante janë dhuruar nga boksieret e dy ekipeve rivale, Vllaznisë dhe Tiranës.

Nga dhjetë ndeshjet e kësaj dite, ballafaqimi Denis Nurja (Tirana) – Kristian Shytani (Vllaznia) është vlerësuar si ndeshja më e bukur. Çifti në fjalë, i pesti sipas radhës së ballafaqimeve në ditën e dytë të kampionatit kombëtar të boksit. ka qenë për llogari të peshës deri në 69 kg. Një ndeshje që i kishte të gjitha brenda, luftën e fortë sportive, rivalitetin që nga minuta e parë e raundit të parë dhe deri në dëgjimin e gongut të mbylljes së ndeshjes.

Takim që i ka mbajtur në tension dhe plot emocione të pranishmit e shumtë në pallatin e sportit “Qazim Dervishi”. Në përfundim, vendimi i gjyqtarisë ishte 3-0 në favor të shkodranit Shytani. E ndërsa Shytani dhe tifozëria shkodrane i gëzohej këtij suksesi që arrihej ndaj një rivali direkt si ekip për titullin “kampion”, reagimi i një prej tifozëve të kampit tiranas ishte debati me gjyqtarët, por gjithçka u neutralizua nga forcat e rendit të pranishme në Pallatin e Sportit.

Ndërkohë sërishmi nga ky çift vjen befasia dhe surpriza tjetër kur si rezultat i një dëmtimi të rëndë në sy, disa minuta më vonë pas një diagnostikimi të stafit mjekësor, për Shytanin është marrë vendim që të mos lejohet të boksojë për ditën e tretë finale. Një problem ky jo i vogël për stafin teknik të Vllaznisë që pa Shytanin ndoshta mund ta ketë më të vështirë realizimin e objektivit të titullit “kampion”.

Kampionati Kombëtar i Boksit për Të Rritur

Rezultatet teknike të ditës së dytë:

Pesha 52 kg  Ago (Vllaznia) – Sulaj (Tirana)      (fiton me VO Ago i Vllaznisë)

Pesha 52 kg  Rama (Dinamo) – Vrapi (Teuta)                0-3

Pesha 60 kg  Zajmi (Dinamo) – Piranej (Vllaznia)         3-0

Pesha 64 kg  Kuqi (Apolonia) – Merkohasani (Tirana) 0-3

Pesha 69 kg  Nurja (Tirana) – Shytani (Vllaznia)           0-3

Pesha 69 kg  Zaimi (Apolonia) – Sorra (Arena)              (fiton Sorra me AB për tërheqje të kundërshtarit)

Pesha 75 kg  Çullhaj (Dinamo) – Lazëri (Teuta)            3-0

Pesha 75 kg  Vashja (Vllaznia) – Beqiri (Tirana)            0-3

Pesha 91 kg  Rama (Tirana) – Kaçaj (Flamurtari)          2-1

Pesha +91 kg           Laçi (Tirana) – Hysa (Vllaznia)                  0-3