ASNN – Barleti Volej dhe Studenti janë fituesit e Kupës së Federatës Shqiptare të Volejbollit për vitin 2015, një trofe që vinte në 70-vjetorin e themelimit të institucionit më të lartë të rrjetës shqiptare. Ndeshja e femrave ka pasur vetëm një kah, sepse Barleti Volej, që drejtohet nga Hasan Gurabardhi, nuk ka lëshuar për asnjë çast. Ndaj dhe ka fituar pastër 3-0, 25-18, 25-19, 25-19, ndërsa Gurabardhi ka qenë i kënaqur me fitoren e djeshme, kurse Barleti Volej përsërit kështu suksesin e një viti më parë.
Kështu, Barleti Volej ka fituar mbrëmë Kupën e Federatës në volejboll për femra, pas triumfit 3-0 në finale ndaj Tiranës, në sfidën që u luajt në Pallatin e Sportit “Asllan Rusi” në kryeqytet. Triumfi i radhës i ekipit universitar, që pasi dominoi dhe fitoi çdo trofe sezonin e kaluar e ka nisur mbarë edhe këtë vit. Volejbollistet e drejtuara nga trajneri Hasan Gurabardhi e dominuan ndeshjen finale dhe e merituan fitoren, duke ngritur lart trofeun.
Ndeshja nis e ekuilibruar në pikët e para, mes dy ekipesh që kanë shumë ndryshime në përbërje krahasuar me sezonin e fundit. Barleti Volej e dominon shpejt ndeshjen, duke marrë frenat e ndeshjes që pas pikës së 12-të të setit të hapjes. Kampionet shkëputen gradualisht e fitojnë 25-18, ndërsa Tirana duket se ka ende nevojë për kolaudim dhe nuk arrin të përballojë ritmin e diktuar nga Barleti, që në setin e dytë ka komandën e lojës gjatë gjithë kohës.
Universitaret shkëputen që në pikët e para dhe fitojnë 25-17. Disi me më shumë rivalitet seti i tretë, pasi Tirana udhëheq në pikët e para. Por pas pikës së 12-të është sërish Barleti që ka komandën, përfiton nga gabimet e skuadrës bardheblu dhe fiton setin 25-19 e krejt takimin 3-0. Kështu, Barleti Volej korr suksesin e parë sezonal, duke sinjalizuar edhe rivalët për synimet e këtij sezoni.
Tirana – Barleti Volej 0-3
(18-25, 17-25, 19-25)
Tirana: E. Tuci, S. Agolli, Pira, Hoxha, Shkurti, Blloku, Nezaj, Lasku, Shira, R. Meta, E. Meta, Fejzullai. Trajner: A. Gorenxa
Barleti Volej: Bici, Hasku, Xhelilaj, Brati, Xhixha, Xheka, M. Tuci, Braho, Thaka, Zeqirllari, Uka, Fagu. Trajner: H. Gurabardhi
Gjyqtar: N. Dervishhasani
Kupa e 70-vjetorit të
Federatës Shqiptare të Volejbollit
Femra
Gjysmëfinalet
(20 tetor 2015)
Tirana – Partizani 3-0
(25-3, 25-6, 25-3)
Barleti Volej – Teuta 3-0
(25-15, 25-13, 25-16)
Finalja
(22 tetor 2015)
Barleti Volej – Tirana 3-0
(25-18, 25-19, 25-19)
Meshkuj
Gjysmëfinalet
(21 tetor 2015)
Tirana – Teuta 2-3
(13-25, 29-27, 25-21, 27-29, 9-15)
Studenti – Vllaznia 3-2
(25-20, 25-13, 17-25, 18-25, 16-14)
Finalja
(22 tetor 2015)
Studenti – Teuta 3-2
(26-24, 24-26, 15-25, 28-26, 15-13)
