Trajneri Xhovani De Biazi ka dalë më në fund në terma konkretë. Edhe pse ka pranuar se kontrata e tij me Shqipërinë vijon deri në vitin 2017, ai ka artikuluar me kujdes kërkesat e tij, hap pas hapi, duke tentuar një shumëfishim të pagës, bazuar në arritjet e tij me ekipin kombëtar të Shqipërisë të cilin e kualifikoi për në finale Kampionatin Evropian “Francë 2016”. Duke folur për “Top Albania Radio”, trajneri i Kombëtares tonë ka lënë të kuptohet e biseda për rinovimin e kontratës duhet bërë dhe ai ka besim se kreu i FSHF-së, Armand Duka do ta mirëkuptojë.
Madje De Biazi ka folur fjalë të mira për numrin një të FSHF-së, shenjë kjo e një diplomacie të njohur të tij. Po aq sa popullor, De Biazi është dhe takticien në lëvizjet e kësaj natyre. Kualifikimi për në Evropian i ka dhënë kredite të shumta dhe dalja me një mesazh ku njofton se Emiratet e Bashkuara Arabe i kanë ofruar atij 1.5 milionë euro në vit, janë shenja të qarta se ai kërkon një shifër të përafërt financiare për të vijuar kontratën me Shqipërinë. “Nuk kam pasur kurrë asnjë problem me zotin Duka në këto thuajse 4 vite që bashkëpunojmë”, – ka thënë ai, duke folur për median në fjalë.
“Jam shumë i kënaqur, në radhë të parë për të, pasi e di se sa e ka kërkuar këtë kualifikim, – ka vijuar italiani me pasaportë shqiptare. – Si tifozi i parë i përfaqësueses mendoj që edhe sot është i pari që gëzon. Ky është një gëzim i madh që fillon nga ai, pasi ai më zgjodhi mua dhe të gjitha strategjitë rreth kësaj lidhen me emrin e tij. Po, unë kam patur oferta dhe po ju them një prej tyre: ka qenë Olimpiakosi i Pireut, një ofertë që më ka ardhur shtatorin e shkuar. Unë iu përgjigja negativisht, pasi doja t’i çoja përpara këta djem deri në fund të kësaj aventure evropiane.”
“Më pas, mund të them se kam patur edhe të tjera oferta nga federata shumë më të pasura se ajo e Shqipërisë, – ka rrëfyer trajneri i Kombëtares kuqezi. – Këtë dimër i kam treguar presidentit një mesazh me një ofertë për 1.5 milionë euro në vit, për një kontratë 2-vjeçare, pra, refuzova 3 milionë euro nga Emiratet e Bashkuara Arabe, duke mos e marrë fare në konsideratë ofertën.” Qëndrimi i De Biazit është mjaft i qartë. Shifra e mëparshme e tij e thënë si me shaka se do të kërkojë 2-3 milionë euro ka qenë sinjal mjaft i qartë për Dukën.
Për më tepër që kreu i FSHF-së gjithë kësaj kohe e ka kuptuar skemën e De Biazit, por ka gabuar duke mos e bërë publike këtë gjë në kohën e duhur, gjë që ka krijuar shumë thashetheme dhe natyrisht shumë pikëpyetje në raportet mes tij dhe De Biazit. Pyetja që do të shtrohet tani e tutje, në muajt para Evropianit, është: a do t’i plotësohen kërkesat De Biazit nga ana e FSHF-së? Apo, a do të gjejnë palët një marrëveshje nëpërmjet një shifre të mesme? Përgjigja do të varet nga vetë De Biazi, i cili arriti që ta detyrojë Dukën të ulet në tavolinë për të diskutuar termat financiarë.
Kualifikimi në Evropian ia ka dhënë këtë të drejtë.
