Kuqezinjtë e Resulit kanë fituar ndeshjen e parë me vendësit dhe duket se do të jenë në garë me Francën për kryesimin e grupit, që do të thotë kualifikim për më tej. “Super-Shqipëri” e futbollit të sallës. Kuqezinjtë e Erind Resulit i kanë nisur me këmbë të mbarë Eliminatoret e Kampionatit Botëror të Futbollit të Sallës, ndërsa kanë munduar skuadrën vendëse të Lituanisë.
E jo pak, por 5-2, me një rezultat me përmbysje të madhe, ndërsa dhjetë minutat e fundit të lojës i kanë shërbyer tanë për t’i bërë lituanezëve që të mos i besojnë syve për atë që po ndodhte. Pjesa e parë ka nisur me disavantazh, teksa Jeremenko ka shënuar në të 4-tën minutë. Por kjo nuk i ka dekurajuar shqiptarët, të cilët gjatë gjithë pjesës së parë janë në kërkim të golit të barazimit.
Por nuk ia kanë arritur. Sikurse kemi qenë me fat dhe në ato raste të lituanezëve. Pushimi i lojës i ka shërbyer Resulit për të dhënë të tjera udhëzime. Dhe vjen shpërthimi. Në harkun kohor të një minute, fillimisht Mejzini dhe më pas edhe Gentian Begaj, një lojtar që luan prej vitesh tek grekët e Athina ’90, kanë përmbysur në 2-1. Tanët nuk dorëzohen, kurse minutat e fundit janë të furishme.
Thellon Roald Halimi dhe më pas edhe Brahimi edhe 4-1. Goli i Garsvinskasit ka vlejtur për statistikë, sepse vulën suksesit ia ka vënë Hasaj. 5-2 një fitore e madhe e tanëve, që do të thotë se këtë herë janë me mendje që do të mund të kalojnë edhe turin. E ajo që e ndan sot “shapin” nga “sheqeri” është ndeshja me Francën, që do të luhet në mbrëmje.
Nëse kalohet edhe kjo, e diela me Maltën duhet të jetë festa e kalimit të një turi në Eliminatore, që praktikisht kuqezinjve tanë nuk i ka ndodhur asnjëherë. Ndaj kjo “super-Shqipëri” e sallës duhet të bëjë atë që ka bërë kombëtarja e madhe e De Biazit, e cila është në finalet e Kampionatit Evropian. Shanset janë.
Lituani – Shqipëri 2-5
Shënues: Jeremejev 4’, Garsvinskas 39’ /
Mejzini 30’, Begaj 30’, Halimi 38’, Brahimi 39’, Hasaj 40’
Lituania: Labuckas, Smolkovas, Zagurskas, Jeremejev, Buinickij / Indrasius, Saltis, Lescius, Smariginas, Petkevicius, Garsvinkas, Steinas, Stradalovas, Kugis. Trajner: K. Rudzionis
Shqipëria: Rrapi, Mejzini, Halimi, Selmanaj, Brahimi / Gashi, Begaj, Hasaj, Bllumbi, Gockaj, Agolli, Karaja, Hoxha, Kaca. Trajner: E. Resuli
Gjyqtarë: K. Çetin (Turqi), O. Niemela (Finlandë)
Kartonë të verdhë: Smolkovas, Steinas, Stradalovas
