ASNN – Më tepër rivalitet pati takimi tjetër i vlefshëm për gjysmëfinalet e 70-vjetorit të Kupës së Federatës në Volejboll për Femra, por gjithmonë Barleti Volej një hap përpara. Të besuarat e trajnerit Hasan Gurabardhi konfirmuan se janë edhe këtë vit skuadra për t’u mposhtur. Seti i parë nis me epërsinë e pjesshme të vendëseve, 6-1.

Barleti Volej dominon lojën 15-10, 18-12. Me favorin e epërsisë, Gurabardhi freskon ekipin me Haskun e Xhelilajn, në vend të Xhixhës e Xhekës (dy afrimet e rëndësishme të këtij sezoni, së bashku me Tucin e Thakën). Seti i parë fitohet nga universitaret, me rezultatin 25-15.

Në setin e dytë Teuta do të mbajë mend vetëm dy pikët e para të epërsisë, sepse më tej vjen pikiata në 3 faza, 8-4, 12-5, 17-7. Me luksin e shumë kualiteteve në radhët e saj bëhet edhe më e lehtë fitorja e setit të dytë për Barleti Volej. Madje, trajneri u jep sërish hapësira të rejave.

Begiçi, Guza e Zakova, lojtaret e përvojës për durrsaket nuk mjaftojnë për mrekullinë. Teuta ndien lodhje pas pushimit të dytë teknik. Në këtë set nuk mungojnë polemikat si rasti i Brahos ndaj kryesorit Shehu, i cili e ndëshkon me karton të verdhë kur Barleti Volej udhëhiqte 16-13.

Barleti Volej fiton edhe setin e tretë me të njëjtat shifra si ai i mëparshmi 25-16.

Kupa e 70-vjetorit të

Federatës Shqiptare të Volejbollit

Femra

Gjysmëfinalet

(20 tetor 2015)

Tirana – Partizani                3-0

(25-3, 25-6, 25-3)

Barleti Volej – Teuta            3-0

(25-15, 25-13, 25-16)

Finalja

(22 tetor 2015)

Tirana – Barleti Volej            ora 16:00

Meshkuj

Gjysmëfinalet

(21 tetor 2015)

Tirana – Teuta                      ora 16:00

Studenti – Vllaznia              ora 18:00

Finalja:

Më 22 tetor 2015                  ora 18:00