Sekretarja e Përgjithshme e Federatës Shqiptare të Gjimnastikës, Fatbardha Shtrepi, ka lajmëruar se është zhvilluar Kupa e Shqipërisë për Të Rritur, Të Rritura, Të Rinj dhe Të Reja. Gjithçka është zhvilluar në mjediset e klubit sportiv “Partizani”. Gjimanstët, gjithnjë sipas informacionit që ka dhënë Shtrepi, e drejtuar nga trajnerët e njohur Vladimir Limaj, Edison Ikonomi, Migena Panariti prezantuan një nivel të lartë në ekzekutimin e veglave.

Kështu më e mira e veprimtarisë është Oneda Reçi, e cila ka bërë edhe një përgatitje dyjavore në Itali. Dhe kjo, sipas Shtrepit, mundësuar nga marrëveshja që presidenti i Federatës Shqiptare të Gjimnastikës, Leonard Lulaj, ka nënshkruar me Federatën e Italisë. Nëse për femra niveli ka qenë më i lart, për meshkuj justifikohet me faktin se kanë vështirësi për shkak të kushteve ku ata stërviten.

Duhet vlerësuar dhe organizimi i klubit sportiv “Partizani”, kurse janë dalluar dhe gjimnastët Xheni Kozi e Vllaznisë, Anxhela Stojna e Vllaznisë, Klea Ruçi e Partizani, Françeska Kodra e Skënderbeut, Oltion Pervataj i Partizanit, Albion Malollari i Tomorit, Elisio Kuçi i Tomorit, Erik Ceka dhe Bajram Xheladini të Skënderbeut. Përfundimisht gjimnastika shqiptare ka shpallur fituesit e Kupës së Shqipërisë 2015.

Kupa e Shqipërisë në Gjimnastikë

Rezultatet teknike:

Të Rritura:

Oneda Reçi (Vllaznia)                    53.70 pikë

Të Reja:

Megi Hamza (Partizani)                  36.90 pikë

Të Rritur:

Bexhet Ruka (Tomori)                     43.95 pikë

Të Rinj:

Gerti Haxho (Tomori)                       34.80 pikë