ASNN – “Za milica pobeda vilim te”, shqipëruar: “Fitore për ty Milica”. Ky ishte dedikimi i çiklistit të Novi Pazarit, që ka hedhur kandidaturën për të qenë ai fituesi i Rrethit të 72-të çiklistik të Shqipërisë. Zyrtarë të Bashkisë Mat dhe banorë të qytetit Burrelit u rezervuan një pritje miqësore sportistëve dhe zyrtarëve të Federatës Shqiptare të Çiklizmit. Me duartrokitje është pritur mbërritja në qendër të qytetit Burrelit e serbit Marko Stankoviç i Novi Pazarit.

Pak çaste pas tij kanë ardhur Besmir Banushi i Apolonisë dhe Ylber Sefa i Kosovës. Drejtuesit e FSHÇ-së dhe zyrtarët e Bashkisë Mat, pjesmarrës në ceremoninë e organizuar në përfundim të kësaj etape, kanë shpërndarë çmimet dhe kanë stimuluar tre fituesit e etapës së dytë, Shkodër-Burrel.

Skënder Anxhaku, Kastriot Punavija dhe Armanda Murrani kanë dhënë certifikatat e vendeve të para, si dhe shpërblimet e dhëna nga Bashkia Mat për Stankoviç, Banushin e Sefën. Në fjalën e tij Presidenti i FSHÇ-së, Skënder Anxhaku, tha se Policia e Shtetit duhet falënderuar për ndihmën e dhënë në mbarëvajtjen e kësaj etape të vështirë. “Ne – vijoi ai – falënderojmë Ministrinë e Arsimit dhe Sporteve, Bashkinë Mat dhe Komitetit Olimpik Shqiptar që dhanë ndihmesën e tyre në zhvillimin e këtij aktiviteti të bukur. Ne si federatë i kemi akorduar një titull mirënjohje kryetarit të Bashkisë Mat, Nezir Rizvani, për kontributin dhe impenjimin e tij për sportin e çiklizmit”, nënvizoi Anxhaku. Ra sy çiklisti serb Stankoviç. Pas marrjes së certikatës nga zyrtari i Bashkisë Mat, Kastriot Punavija dhe kupës nga numri një i çiklizmit Skënder Anxhaku, ai nxorri një letër ku shkruhej “Za milicu pobeda vilim te”. Shqipëruar: Fitore për ty Milica. Sot do të shkohet nga Burreli në Durrës.

Rrethi i 72-të Çiklistik i Shqipërisë

Fituesit e etapës së dytë

Shkodër-Burrel (98.3 kilometra)

1)         Marko Stankoviç (Novi Pazar)       2h48’46”

2)         Besmir Banushi (Apolonia)                       2h49’53”

3)         Ylber Sefa (Kosovë)                                    2h50’35”

Renditja e përgjithshme individuale

1)         Marko Stankoviç (Novi Pazar)       5h23’20”

2)         Besmir Banushi (Apolonia)                       5h24”00”

3)         Ylber Sefa (Kosovë)                                    5h25’10”

Renditja e përgjithshme ekipore

1)         Apolonia                                            16h20’43”

2)         Teuta                                                  16h34’47”

3)         Velo Kumanova                               16h36’51”