Federata Shqiptare e Futbollit ka pranuar ditët e fundit nëpërmjet zyrtarëve të saj se biletat e ndeshjes Shqipëri-Serbi nuk kanë kaluar në duart e tifozëve, por kanë përfunduar tek njerëzit që nuk kanë lidhje me futbollin. Referuar qëndrimeve që dha sekretari Ilir Shulku, vetëm 20% e biletave kanë shkuar në duart e tifozëve dhe kjo është një shifër shumë e paktë krahasuar me nevojat që kanë tifozët e ekipit kombëtar, të cilët këtë herë mbetën jashtë stadiumit.
Ndër të tjera Shulku foli për ndeshjen dhe për interpretimin e saj si një përballje sportive, duke mohuar se do të ketë serbë në “Elbasan Arena”. “Nuk është e vërtetë që do të ketë tifozë serbë në stadium, – ka thënë nr. 2 i organizmit që qeveris futbollin shqiptar. – Bëhet fjalë për në grupim studentor që nga një marrëveshje e iniciuar nga qeveria shqiptare dhe serbe në një mbledhje të organizuar në Berlin me Kancelaren gjermane Merkel.”
“Kemi shitur online 20% të biletave, dhe me grupimet e dedikuara, që tashmë dihen që janë mbështetësit kryesorë të ekipit kombëtar, kemi ruajtur marrëdhënie konstante”, shtoi zyrtari i Federatës Shqiptare të Futbollit. Sekretari i Përgjithshëm i FSHF-së tha se janë marrë masa që të mos ketë asnjë veprim jashtë fushe që të ndikojë në ecurinë e lojës.
“Të gjithë duam fitore dhe duhet të përkrahim Kombëtaren”, – tha Shulku. Grupimi i vetëm në stadium do të jetë ai i “Tifozëve Kuq e Zi”, të cilët në bashkëpunim me Federatën do të bëjnë një koreografi. i ftuar në këtë ndeshje do të jetë dhe zyrtari i lartë i UEFA-s, Sekretari i Përgjithshëm i saj, Xhani Infantino.
