ASNN – Japonezi Hidekiçi Mijazaki vendosi ditët e fundit një rekord të ri botëror si sprintieri më i vjetër në botë, duke garuar vetëm një ditë pasi kishte festuar 105-vjetorin e lindjes. Mizajaki garoi këtë javë në disiplinën e 100 metrave, duke e përshkuar këtë distancë me kohën 42 sekonda e 22 të qindtat. Megjithatë, japonezi ishte i zhgënjyer me veten, pasi ishte shumë larg kohës së tij më të mirë. Ëndrra e tij? Të sfidojë në pistë Jusein Boltin!
Jusein Bolti mund të jetë njeriu më i shpejtë në botë, por, në Lindjen e largët kanë edhe ata versionin e tyre të “Njeriut të rrufeshëm”. Madje ai është një njeri që po thyen edhe një numër rekordesh të tjera. Japonezi Hidekiçi Mijazaki vendosi ditët e fundit një rekord të ri botëror si sprintieri më i vjetër në botë, duke garuar vetëm një ditë pasi kishte festuar 105-vjetorin e lindjes.
I lindur më 22 shtator të 1910-tës, Mijazaki ishte vetëm 8 vjeç kur përfundoi Lufta e Parë Botërore dhe 34 vjeç kur Japonia u mund në Luftën e Dytë Botërore. Ai nuk ishte marrë me vrapime derisa sa mbushi 90 vjeç, kohë kur edhe një numër i madh bashkëmoshatarësh të tij nuk ishin më. “Samurai i pistës” Mijzaki garoi këtë javë në disiplinën e 100 metrave, duke e përshkuar këtë distancë me kohën 42 sekonda e 22 të qindtat.
Megjithatë, japonezi ishte i zhgënjyer me veten, pasi ishte shumë larg kohës së tij më të mirë. “Desha t’i heq disa sekonda rekordit dhe më vjen inat, sepse në stërvitje 100 metrat i kam bërë për 36 sekonda”, – tha Mijazaki, i cili mban rekordin botëror të 100-vjeçarëve në këtë disiplinë, me kohën 34 sekonda e 10 të qindtat, rekord të cilin e vendosi kur ishte 103 vjeç. Japonezi, i cili njihet si “Bolti i Artë”, për imitimin që i bën xhamajkanit, thotë se e ka ëndërr të sfidojë një herë njeriun më të shpejt në botë.
