ASNN – Mungesa e kushteve minimale për zhvillimin e takimeve ndërkombëtare në Pallatet e Sportit në Shqipëri ka bërë që Kombëtarja e basketbollit për femra të mos do të lejohet t’i luajë në Shqipëri ndeshjet e para të saj në kuadër të Eliminatoreve të Evropianit të ardhshëm. Në lidhje me këtë problem, Sekretari i Përgjithshëm i Federatës së Basketbollit, Korab Llazani, ka theksuar lipset reagimi nga institucionet përkatëse, duke dhënë edhe alarmin për ndëshkimet e rënda që mund të marrë basketbolli shqiptar në vijim.
Kombëtarja e basketbollit për femra nuk do të lejohet t’i luajë në Shqipëri ndeshjet e para të saj në kuadër të Eliminatoreve të Evropianit të ardhshëm. Një gjë e tillë është konfirmuar për AlbanianSport.com nga Sekretari i Përgjithshëm i Federatës së Basketbollit, Korab Llazani, i cili ka theksuar lipset reagimi nga institucionet përkatëse. “Pas inspektimit të FIBA-s, ne kemi vijuar komunikimin me instancat shtetërore përkatëse për masat që duhen marrë për të shmangur më të keqen”, – ka deklaruar ai.
“Megjithatë, edhe nga komunikimi i deritanishëm që kemi me FIBA-n, duket se ndeshjet e para në fushën tonë do të detyrohemi t’i luajmë jashtë Shqipërisë dhe kjo është për të ardhur keq, – ka vijuar Llazani, duke folur për AlbanianSport.com. – Sidoqoftë, unë shpresojë që të ketë një reagim nga ana e shtetit, që të shmanget një gjë e tillë, sepse mundësitë janë dhe besoj që koha ka ardhur për një ndërhyrje, të paktën në Pallatin e Sportit “Asllan Rusi” në kryeqytet, që ky mjedis sportiv të kthehet në nivele të pranueshme.”
Madje Llazani jep alarmin për ndëshkimet që mund të marrë basketbolli shqiptar në vijim. “Mosluajtja e ndeshjeve të përfaqësueses së femrave është një realitet drejt të cilit duket se po shkojmë, ndërsa vitin tjetër janë meshkujt dhe, nëse vazhdon e njëjtja gjendje, Federata jonë dhe vetë Shqipëria rrezikon ndëshkime edhe më të rënda dhe afatgjate”, – ka përfunduar Llazani. Kështu, mjediset sportive të lojërave me dorë në Shqipëri nuk pranohen më për veprimtaritë ndërkombëtare, çka duhet të shërbejë si këmbanë alarmi.
