ASNN – Gjasula, Hyka, Shala dhe Mushica shënojnë në Evropë, por munden Lorik Cana dhe Emir Lenjani. Plot pesë gola shqiptarë u shënuan këtë fundjavë. Jurgen Gjasula ishte më i miri ndër lojtarët shqiptarë në Evropë, duke tundur dy herë rrjetën në Bundesligën e dytë gjermane.
Ai i dha fitoren Grojther-Fyrthit në fushën e Unionit të Berlinit, dhe i kujtoi trajnerit të Kombëtares kuqezi, Xhovani De Biazi, se mbetet një kandidat. Berlinezët kaluan të parët në epërsi, por Gjasula realizoi në pjesën e dytë, një herë me goditje dënimi, të dytën herë me 11-metërsh.
Gol në Zvicër për Jahmir Hykën, edhe ky një tiranas. Lojtari i talentuar shënoi në përballjen e Kupës në fushën e Nojshatelit të Ksamaksit, ku ekipi i tij, Lucerna, fitoi 4-2.
Gola shqiptarë edhe në Holandë, por edhe në Republikën Çeke. Në Holandë, Milot Rashica, lojtar i përfaqësueses së Nën-21-vjeçarëve të Shqipërisë, shënoi për Vitesen në suksesin 3-0 ndaj De Grafshapit në kampionat.
Ndërsa në Republikën Çeke, Herolind Shala realizoi në fitoren po 3-0 të Sllovanit të Liberecit ndaj Pribramit. Por, kuqezinjtë kanë kaluar nga festa në hidhërim. Lorik Cana dhe Emir Lenjani kaluan një ditë të vështirë në fushën e St. Etienit, ku skuadra e tyre, Nanta, u mund 0-2 në kampionatin francez.
Mbrojtësit shqiptarë e patën shumë të vështirë të përballonin sulmuesit vendas, si Bamba në të 26-tën minutë apo Beriç në të 47-tën që shënuan edhe golat, nga një në secilën pjesë loje. Megjithatë, kjo ishte një fundjavë mjaft pozitive për kuqezinjtë e Kombëtares me klubet e tyre përkatëse.
