Sulmuesi i Mançester Junajtid, i cili ka shënuar dje me 11-metërsh në portën e Zvicrës, ka thyer të gjitha rekordet e pjesëmarrjes së tij në ekipin e “luanëve”. Tetë ndeshje, tetë fitore, anglezët për histori. Anglia e Roi Hodxhsonit është skuadra absolute e Eliminatoreve të Kampionatit Evropian “Francë 2016”. Tetë ndeshje, tetë fitore dhe 24 pikë të plota si askush tjetër për anglezët, ndërsa skuadra e “luanëve” është e gatshme që të bëjë surprizën edhe në Francë vitin e ardhshëm.
Mbrëmë anglezët kanë mundur Zvicrën 2-0, me të njëjtin rezultat që e kishin mundur dhe në shtatorin e kaluar në ndeshjet hapëse të këtyre Eliminatoreve. Dhe kjo Angli e rekordeve ka dhe një tjetër rekord, që është Uejn Runi, shënuesi më i mirë i të gjitha kohërave për përfaqësuesen e vendit që ka shpikur futbollin. Nëse ndaj San Marinos me 49 gola me fanellën e Anglisë ai kishte barazuar rekordin e kampionit të otës më 1966, Bobi Çarltonit, dje Runi ka arritur në kuotën e 50 golave.
Ndonëse ka shënuar nga pika e bardhë e 11-metërshit, e cila ka vulosur suksesin e Anglisë, ndërsa më parë kishte shënuar Herri Kejn, në minutën e 67-të. Më parë gjërat nuk kishin shkuar mirë për Anglinë, sepse Delfi e ka lënë ndeshjen që në të 3-tën minutë për shkak të dëmtimit. Zvicra është përpjekur që të befasojë, por në fund Anglia, e sprovuar për të qenë gjithnjë në krye të grupeve eliminatore, ia ka dalë të fiksojë fitoren e tetë ndaj Zvicrës.
Ajo që duhet theksuar është se futja e Kejnit ia ka ndryshuar të gjithë fytyrën lojës së skuadrës së Hodxhsonit, e cila deri në atë momente ishte e zymtë. Përfundimisht 2-0 për Anglinë dhe një Uejn Runi me rekorde ndeshje pas ndeshjesh.
Angli – Zvicër 2-0
Shënues: Kejn 67’, Runi 84’(11-m.)
Anglia: Hart, Klajn (Stouns 68’), Kahill, Smolling, Shou, Milner, Shelvi (Kejn 57’), Delf (Berkli 3’), Çambërlein, Runi, Stërling. Trajner: R. Hodxhson.
Zvicra: Somer, Lihshtajner, Shaar, Klose, Rodrigez, Behrami (Xhemaili 79’), Inler, G. Xhaka, Shaqiri, Stoker (Seferoviç 72’), Dërmiç (Embolo 63’). Trajner: V. Petkoviç
Gjyqtarë: Xh. Roki, E. Di Liberatore, Xh. Kariolato, L. Banti, A. Damato (Itali)
Kartonë të verdhë: Smolling, Milner
