ASNN – Java evropiane e futbollit ka nisur të enjten me ndeshjet e dyta në grupet C, E dhe G, dhe Rrjeti i Radio-Televizionit Shqiptar ka sjellë për sportdashësit takimin më të spikatur të mbrëmjes, atë midis Sllovakisë dhe Spanjës. Vendasit e shtangën kampionen në fuqi të Evropës, duke e mundur me rezultatin 2-1, ndërsa sonte luhen ndeshjet e 3 grupeve të tjera.

Rrjeti i Radio-Televizionit Shqiptar do të sjellë për sportdashësit drejtpërdrejt takimin e orës 20:45, midis Italisë dhe Azerbajxhanit. Duket se kriza e eliminimit të turpshëm nga Botërori i këtij viti vazhdon për Spanjën, pasi kampionia në fuqi e Evropës ka pësuar të enjten të mbrëmje një humbje 1-2 në Stadiumin e Zhillinës, përballë përfaqësueses vendase, Sllovakisë.

Për më tepër, kjo humbje i dha fund një vazhde historike 8-vjeçare, prej 36 ndeshjesh, që spanjollët nuk pësonin një humbje në fazën eliminatore të një veprimtarive madhore, Evropianëve apo Botërorëve. Juraj Kuçka e ka kaluar Sllovakinë në epërsi që në minutën e 17-të dhe pjesa e parë është mbyllur me këtë epërsi njëgolëshe të përfaqësueses vendase.

Në pjesën e dytë, këmbëngulja e Spanjës, që është ndalur kryesisht nga heroizmat e portierit vendas, është shpërblyer në minutën e 84-t, kur i sapofuturi në lojë, Alkaser, ka barazuar shifrat. Kjo barazi zgjat vetëm 3 minuta, pasi Kamil Stok do të finalizojë mjaft bukur një kundërsulm të vendasve dhe do të vulosë fitoren 2-1 të Sllovakisë, që merr e vetme kreun e renditjes së grupit C, me 6 pikë.

Java evropiane e futbollit ka nisur kështu të enjten me ndeshjet e dyta në grupet C, E dhe G, ndërsa sonte luhen ndeshjet e 3 grupeve të tjera, A, B dhe H. Rrjeti i Radio-Televizionit Shqiptar do të sjellë për sportdashësit drejtpërdrejt takimin e orës 20:45, midis Italisë dhe Azerbajxhanit.