Shqipëria do të luajë në fillim të shtatorit dy ndeshje vendimtare për fatet e kualifikimit në grupin I i Eliminatoreve për në Kampionatin e ardhshëm Evropian të Futbollit “Francë 2016”. Fillimisht përballet me Danimarkën më 4 shtator 2015 në Kopenhagen, ndërsa 3 ditë më pas do të presë në stadiumin “Elbasan Arena” skuadrën përfaqësuese të Portugalisë.
Në këtë ndeshje duket se ka sinjale pozitive për ekipin e Xhovani de Biazit, pasi kombëtarja portugeze po kalon një moment jo të mirë, si pasojë e dëmtimeve të shumta dhe formës jo të mirë të lojtarëve të saj, përfshi dhe sulmuesin Kristiano Ronaldo. Ky është padyshim një lajm i mirë për trajnerin De Biazi dhe skuadrën kuqezi, e cila ka ambicie të mëdha për kualifikim.
Dhe pjesëmarrja në “Francë 2016” varet kryesisht nga rezultati i këtyre dy takimeve të radhës, në veçanti ndeshja në fushën tonë me Portugalinë. Kur na ndajnë më pak se dy javë nga sfida e 7 shtatorit mes Shqipërisë dhe Portugalisë që do të zhvillohet në Elbasan Arena, situata në të cilën gjendet përfaqësuesja luzitane nuk duket se është shumë e mirë
Për këtë arsye, shanset e Kombëtares kuqezi për të arritur një tjetër fitore historike ndaj Portugalisë pas asaj në Aveiro sa vinë e shtohen. Të premten, trajneri Fernando Santos do të bëjë publike listën e lojtarëve të grumbulluar për dy sfidat e shtatorit ndaj Francës dhe Shqipërisë, por problemet për 60-vjeçarin nuk mungojnë. Portugalia do të jetë praktikisht pa mesfushë në sfidën e “Elbasan Arenës”.
Treshja titullare në repartin e ndërmjetëm në fitoren 3-2 ndaj Armenisë në fushën e kësaj të fundit, e përbërë nga Zhao Mutinjo-Thiago Mendes dhe Fabio Kontrao, i cili në kombëtare luan më i avancuar se te Reali i Madridit, nuk do të jetë e njëjta ndaj Shqipërisë. Mesfushori i Monakos ka pësuar një dëmtim dhe do të mungojë për rreth 1 muaj.
Thiago, nga ana tjetër, u ndëshkua me karton të kuq ndaj Armenisë dhe është i skualifikuar ndërsa i vetmi që mund të luajë është Fabio Kontrao, por edhe ky i fundit nuk po kalon një situatë aspak pozitive te Reali i Madridit dhe nuk ndodhet në formën e tij optimale. Përpara disa vitesh, një fitore kundër Portugalisë konsiderohej si një mision i pamundur për kuqezinjtë tanë por tashmë situata ka ndryshuar ndjeshëm.
Fitorja 1-0 në sfidën e parë të grupit i eliminator ndaj luzitanëve në Aveiro, ngriti moralin e formacionit të drejtuar nga Xhovani de Biazi, me Shqipërinë që është gjithnjë e më pranë realizimit të ëndrrës, kualifikimit për herë të parë në një kampionat evropian. Një sukses ndaj Portugalisë nuk konsiderohet më një mision i pamundur dhe këtë e dinë shumë mirë De Biazi dhe të besuarit e tij.
Kjo pavarësisht faktit se problemet nuk mungojnë as te Kombëtarja kuqezi me Mavrajn, Currin e Memushajn të dëmtuar dhe Canën e Arlind Ajetin që nuk gjatë gjetur ende një skuadër të re për të vijuar karrierën. Megjithatë një tjetër e dhënë që favorizon Shqipërinë është se ylli i Portugalisë, Kristiano Ronaldo, nuk ka arritur akoma formën e tij ideale, madje në miqësoret e verës ka shënuar vetëm një gol.
Edhe Dani e Nani nuk janë më ata të dikurshmit. Tek Fenerbahçe, ish-lojtari i Mançester Junajtid, edhe pse luan rregullisht ka humbur shumë nga klasi i tij, ndërsa sulmuesi i Zenitit të Shën Pjetërburgut më shumë sesa titullar lihet në stol nga bashkëatdhetari i tij, trajneri Andre Vijash Boash, në pjesën më të mirë të ndeshjeve në Rusi dhe Evropë.
Alternativat për Fernando Santos nuk mungojnë me të rinjtë premtues si Adrien Silva, Uilliam Karvajo e Bernardo Silva që po shpërthejnë me klubet e tyre respektive, por pavarësisht gjithçkaje situata në të cilën ndodhet Portugalia është shpresëdhënëse për Shqipërinë. E sigurt është që një tjetër fitore ndaj tyre nuk mund të konsiderohet më një mision i pamundur.
