Trajneri Pioli: “Ende nuk kemi fituar asgjë, kemi dhe 90 minuta të tjera për të luajtur në Leverkusen, që do të jenë më të vështira se sa ndeshja e parë në “Olimpiko”. Nuk kemi fituar ende asgjë dhe nuk jemi të kualifikuar.” Kështu e ka nisur deklaratën e tij, trajneri i Lacios, Stefano Pioli, në prag të ndeshjes së kthimit me Bajer Leverkusenin, e cila sonte në mbrëmje do të luhet në tokën gjermane.
“Fitorja 1-0 e ndeshjes së parë është vetëm hapi i parë dhe për këtë jemi të gjithë të vetëdijshëm, – ka thënë ai. – Nuk kemi fituar asgjë akoma”. Pioli ka karikuar të tijtë në këtë mënyrë në prag të sfidës së kthimit të “play-off”-it të Ligës së Kampioneve, atje ku kualifikimi do të thotë kalimi në grupet e kësaj veprimtarie. “Duhet të jemi shumë të vëmendshëm”, – vazhdon trajneri bardhekaltër.
“E dimë që do të jetë një ndeshje e luftuar, – ka theksuar Pioli. – Duhet të luajmë për të fituar dhe të tregohemi të zot për ta vënë në vështirësi kundërshtarin”. Të rëndësishme për Lacion janë mungesat e Kloses dhe Biljas, të dy të dëmtuar, sikurse dhe Marketi e Xhorxheviçi.
“Nëse humbasim diçka për shkak të mungesës së eksperiencës duhet ta fitojmë atë nëpërmjet freskizë fizike në fushë dhe shpejtësisë në veprime”, – përfundon trajneri Pioli, ndërsa Lacio ka bërë dhe stërvitjen e fundit në stadiumin e Bajer Leverkusen në orarin e ndeshjes. Ashtu sikurse është bërë e ditur dhe më parë, takimi e gjykon spanjolli Velasko.
Bajer Leverkusen – Lacio (20:45)
Formacionet e mundshme
Bajer Leverkusen: Leno, Hilbert, Tah, Papadopulos, Vendeli, Kramer, Bender, Belarabi, Çalhanollu, Mehmedi, Kiesling.
Të gatshëm: Kresiç, Ramajo, Donati, Brand, Son, Kruse, Rui
Lacio: Berisha, Mauricio, De Vrij, Radu, Basta, Onazi, Parolo, Luliç, Kandreva, Keita, Felipe Anderson.
Të gatshëm: Guerrieri, Xhentileti, Konko, Milinkoviç-Saviç, Kataldi, Morrison, Kishna
Gjyqtar: Velasko Karbalo (Spanjë)
