Mundja po përjeton ditë të vështira, për shkak të përçarjeve të brendshme, në kuptimin që ish-drejtues të saj vite më parë janë kundër drejtuesve të tanishëm dhe po bëjnë ç’është e mundur që të bllokojnë veprimtarinë e Federatës Shqiptare të Mundjes. Me apo pa të drejtë, fondi “grant” për këtë federatë është bllokuar nga Ministria e Arsimit dhe Sportit, por pasojat e kësaj lëvizjeje i vuajnë sportistët, sidomos elementët e ekipit kombëtar, të cilëve nuk u mundësohet pjesëmarrja në veprimtaritë ndërkombëtare.
Federata dhe sportistët kanë bërë peticion MAS-it që të reflektojë dhe të hapë fondin për mundjen, por deri më tani nuk ka zgjidhje. Në mungesë të zgjidhjes institucionale mundja po shqyrton mundësitë private dhe të donatorëve për të mundësuar pjesëmarrjen në Kampionatin Botëror, i cili ka vlerë për kualifikim në Olimpiadën e vitit të ardhshëm në Brazil, “Rio 2016”.
Duke folur për këto probleme, mundësi dhe njëherësh trajner i këtij sporti, Sahit Prizreni, theksoi se bllokimi i fondit të mundjes nga MAS është një lëvizje e pamoralshme, e pabazuar në ligj, madje antikombëtare. Prizreni shtoi më pas në intervistën e tij për “SOT” se kjo sjellje arrogante, e paskrupullt dhe antiligjore është një hakmarrje personale dhe politike e një grupi individësh me funksione shtetërore.
AlbanianSport.com jua sjell në dy pjesë intervistën e mundësit të mirënjohur, Sahit Prizreni, për të përditshmen shqiptare “SOT” dhe sot është pjesa e parë, kurse nesër pjesa e dytë.

– Komuniteti i mundjes zhvilloi një protestë për bllokimin e fondit grant nga Ministria e Arsimit dhe Sportit, por në të njëjtën kohë keni dërguar dhe një peticion në MAS, për zgjidhjen e ngërçit. A keni marrë përgjigje? Nëse jo, çfarë prisni konkretisht të arrini?
– Situata në komunitetin e mundjes është mjaft e rëndë, sepse në mungesë të grantit rrezikohen veprimtaritë sportive kombëtare e ndërkombëtare. Deri në këtë moment që po flasim nuk ka një përgjigje nga MAS për pretendimet tona dhe kërkesat tona. Madje nuk ka asnjë reagim, qoftë dhe mediatik, nga zyrtarët e ministrisë, për këtë akt të pashembullt e të pamoralshëm ndaj një komuniteti sportiv. Jetojmë në një vend demokratik dhe MAS ka detyrim moral, ligjor dhe që e parashikojnë rregulloret përkatëse. Duhet të ketë një zgjidhje me patjetër, sepse në të kundërt dëmtohen rëndë interesat e mundjes, sportistët dhe klubet. Duke u sjellë në këtë mënyrë, MAS nuk po e kupton as vetë se po shkel rëndë ligjet. Kjo është e pafalshme për një institucion qeveritar, i cili ka në objektivat madhore të veta hartimin e politikave zhvillimore për sportin e jo krijimin e pengesave të kota që e dëmtojnë rëndë sportin.

– Me sa dimë ky është vit kualifikimi për në Olimpiadë. Pra pjesëmarrja në Botëror vjen si domosdoshmëri…
– Absolutisht po. Ky është vit vendimtar për kualifikimin në Olimpiadë, por sjellja e MAS është e paligjshme dhe e pamoralshme. Po merren me gjëra personale dhe nuk japin zgjidhje. Unë si Sahit, si pjesëtar i komunitetit të mundjes, jam gati të përballem me këdo kur është fjala për të mbrojtur të drejtën e sportistëve. Por në sjelljen e MAS ka tendenca politike e personale, duke e bërë këtë institucion në raport me komunitetin e mundjes të turpshëm.

– Cila mund të jetë zgjidhja?
Shumë e thjeshtë: T’i jepet federatës fondi “grant”. Fondi duhet lëvruar sa më shpejt që sportistët të kenë mundësi të realizojnë objektivat e tyre. Në lojë duhet të futet edhe KOKSH, pasi edhe ai si institucion ka shfaqur pretendime. Ne si komunitet jemi në rregull. Kemi bërë atë çfarë parashikon ligji dhe rregulloret përkatëse të parashikuara në statutin e federatës. Topi qëndron në anën e MAS-it që duhet të përmbushë detyrimet e veta ligjore e institucionale.

Vijon neser…