ASNN – Një investim prej 3 milionë eurosh i Ministrisë së Kulturës, Rinisë dhe Sportit dhe Komunës së Prishtinës, pritet ta kthejnë stadiumin e kryeqytetit të Kosovës në një stadium të standardeve bashkëkohore, të përshtatshëm për të pritur ndeshje ndërkombëtare. Ky projekt parashikohet të finalizohet gjatë vitit 2016, shkruajnë mediat e Prishtinës.

Ministria e Kulturës, Rinisë dhe Sportit dhe Komunës së Prishtinës nënshkruan sot Memorandumin e Mirëkuptimit lidhur me rinovimin tërësor të Stadiumit të Qytetit të Prishtinës. Në këtë ceremoni ishin të pranishëm ministri Kujtim Shala, kryetari i Prishtinës, Shpend Ahmeti, presidenti i Federatës së Futbollit të Kosovës, Fadil Vokrri, si dhe zv/presidenti i klubit të futbollit “Prishtina”, Ahmet Kurtolli.

Memorandumi i nënshkruar parashikon një investim të rëndësishëm në përmirësimin e infrastrukturës së Stadiumit të Prishtinë. Projekt në përgjithësi ka vlerën e rreth 3 milion eurosh, 75% e të cilave janë investime të MKRS-së, ndërkaq 25% të Komunës së Prishtinës dhe parashikohet të finalizohet gjatë vitit 2016. Ministri Shala e vlerësoi këtë moment si një ngjarje tejet të rëndësishme për sportin e Kosovës.

Ngjarje e rëndësishme sidomos për kryeqytetin, meqë me Komunën e Prishtinës po investohet në përmirësimin e ndjeshëm të infrastrukturës së Stadiumit të Prishtinës dhe në arritjen e standardeve ndërkombëtare. Ndërkaq, presidenti i Federatës së Futbollit të Kosovës, Fadil Vokrri falënderoi ministrin Shala dhe kryetarin e Komunës, Ahmeti, për bashkëpunimin.

Ai shtoi se në këtë stadium prej se ekziston nuk janë bërë investime të tilla, prandaj ky është një moment historik. Kryetari i Prishtinës, Shpend Ahmeti, u shpreh se ky investim është i domosdoshëm dhe ndihmon dukshëm në përmirësimin e infrastrukturës në Stadiumin e Prishtinës, që të jetë i gatshëm për gara ndërkombëtare, sidomos tani kur futbolli i Kosovës pritet të pranohet në organizmat ndërkombëtarë.