ASNN – “Adidas”-i ka konfirmuar se nxjerrja në treg e fanellës së re të Mançester Junajtid ishte më e suksesshmja, si në historinë e kompanisë, ashtu edhe të klubit. Gjigandja gjermane e veshjeve dhe pajisjeve sportive ka firmosur një marrëveshje prej 10-vjeçare prej 750 milionë stërlinash (afro 1 miliard euro), duke zëvendësuar që nga 1 gusht rivalen amerikane, “Nike”, si partnerja e re e klubit.
Dhe shenjat e para duket të jenë të mira, me thyerjet e bujshme të rekordeve të shitjeve. Sipas kompanisë së mirënjohur ndërkombëtare, fanella e re e “Djajve të kuq”, solli shitjet e parashikuara të një muaji brenda vetëm 5 ditësh, ndërkohë që dyqanet e klubit anembanë botës raportuan një rritje në masën 200 %, krahasuar me prezantimin e fanellës së vitit të shkuar.
Vetë dyqani qendror në qytetin e Mançeserit raportoi shitjet e parashikuara të një jave brenda vetëm 5 ditësh. “Adidas”-i raportoi se në mediat sociale, materialet apo lajme për fanellat e reja u shpërndanë plot 212 milionë herë, ndërsa videoklipi i prezantimit të fanellës u pa dy milionë herë. Administratori i përgjithshëm i kompanisë për futbollin, Markus Bauman, nuk e fshehu kënaqësinë duke folur për këtë fakt.
“”Adidas”-i është tejet krenar në prezantimin e partneritetit me Mançester Junajtid, një marrëveshje që përgjatë 10 viteve të ardhshme do të bashkojë dy markat sportive më të mira të botës, – tha ai. – Ky partneritet ka prodhuar që tani rezultate që kanë thyer rekordet nëpërmjet një fushate që ka përfshirë miliona admirues anembanë botës dhe ka rritur dukshëm anembanë globit shitjet e fanellës së parë të skuadrës.”
“Ne besojmë se do të mbështetemi tek ky sukses për ta çuar edhe më larg partneritetin tonë në vitet që do të vijnë.”
Ndërsa drejtori administrativ i klubit anglez, Riçard Arnold, shtoi: “Ne prisnim shumë nga partneriteti me “Adidas”-in, sepse ofroi një uniformë cilësore të fjalës së fundit, një marketing të shkëlqyer, rrjet shpërndarjeje të kalibrit botëror dhe të kuptuarit e thellë të historisë sonë dhe të tifozëve tanë. “Adidas”-i jo vetëm që e ka përligjur atë që prisnim ne, por i ka tejkaluar dukshëm pritshmëritë tona.”
“Fanella e re u ka hyrë në zemër tifozëve, si përsa i përket lidhjes që ka me historinë tonë, ashtu edhe me cilësinë e prodhimit, – ka vijuar ai. – Dhe përpara kemi zhvillimet të reja interesante dhe historike dhe, sikundër tifozët tanë, edhe unë jam i ngazëllyer për dhjetëvjeçarin e ardhshëm, si brenda, ashtu edhe jashtë fushës së blertë.” Uniforma e tretë e Mançester Junajtid pritet të prezantohet gjatë ditëve të fundit të gushtit.
