Ndryshe nga futbolli që ka arritur një nivel të kënaqshëm cilësie, shfaqur me ecurinë e mirë të klubeve tona në veprimtaritë evropiane dhe me paraqitjen e kënaqshme të ekipit kombëtar në Eliminatoret e “Francë 2016”, basketbolli është shumë prapa, me probleme të mprehta dhe nivel gare aspak të kënaqshëm, si dhe me diferenca të shprehura me kundërshtarët evropianë, qofshin këto dhe vende sa Shqipëria. Natyrisht, problemi në basketboll është i trashëguar, që lidhet me mungesën e infrastrukturës së nevojshme dhe me mungesën e vëmendjes së duhur nga institucionet përkatëse politike që menaxhojnë sportin në vend.
Prej kohësh flitet për mungesën e ambienteve dhe qeveritë që ia lëshojnë vendin njëra-tjetrës bëjnë shumë pak në këtë drejtim, duke bërë që basketbolli ynë të mbetet në nivel mediokriteti. Gjithsesi, premtues është fakti se ka talente, ka të rinj që angazhohen dhe dëshirë për të punuar, por bëhet shumë pak për t’u dhënë një të ardhme sportive këtyre elementëve. Duke folur për këto probleme, trajneri i njohur i Kamza Basket, Adem Muhametaj, shprehet për gazetën “SOT” se në Shqipëri basketbolli, ndryshe nga Kosova që e trajton si sport primar, trajtohet i dorës së dytë.
Dhe duke u vlerësuar në këtë formë, ndaj tij ka humbur interesimi apo kujdesi i duhur nga institucionet, dëshmuar me investimin e paktë në palestra dhe infrastrukturë sportive në tërësi. Muhametaj komenton edhe ecurinë e Kamza Basket në basketbollin shqiptar, pretendimet për titullin dhe pjesëmarrjen vitin e ardhshëm në Ligën Ballkanike. Ndryshe nga klubet e tjera, çështjen e basketbollit në Kamzë e kanë zgjidhur, pasi është ndërtuar palestra dhe Kamza ka ekipe moshash si dhe ekip femrash, duke i dhënë përparësinë e duhur këtij sporti.
Megjithatë, për Muhametajn nevojitet që basketbolli të marrë përkushtimin e duhur të instancave, në mënyrë që të shfrytëzohet potenciali i ri dhe Shqipëria të ketë një ligë profesioniste dhe të jetë rivale e denjë në rang evropian. Në dy ditët në vijim, AlbanianSport.com do t’jua sjellë të plotë dhe në dy pjesë intervistën që trajneri i basketbollit, Adem Muhametaj, dha për të përditshmen shqiptare “SOT”.
