ASNN – Skënderbeu vuajti sindromën e vjetër të fundit të ndeshjeve, por gjeti përballë një kundërshtar të një niveli shumë të lartë. Ky është mendimi i gazetarit dhe opinionistit sportiv, Fatmir Mneri, i cili, duke folur për AlbanianSport.com, ka bërë një analizë të sfidës së parë të korçarëve me Dinamon e Zagrebit.
Skënderbeu dha maksimumin e vet në takimin e parë të “play-off”-it të Ligës së Kampioneve dhe thjesht u mund nga një kundërshtar më i fortë. Ky është mendimi i gazetarit dhe opinionistit të mirënjohur sportiv, i cili vlerëson nivelin e lartë të Dinamos së Zagrebit.
“Në një ndeshje futbolli, të çfarëdolloj niveli, por edhe të nivelit të Ligës së Kampioneve, them se mund të ndodhë gjithçka, – tha Mneri. – Mund të ndodhë që, përkundër logjikës së lojës, të arrish atë rezultat, siç ndodhi në pjesën e parë, apo siç ndodhi në të kundërt, në pjesën e dytë, ku kemi bërë një fillim të mirë.”
“Mund të shpërbleheshim për këtë me një gol të dytë që, mbase mund t’i jepte një tjetër rrjedhë lojës, – ka vijuar ai. – Por, sidoqoftë, në të përgjithshmen, më vjen ndërmend ajo e famshmja anekdotë “Pse nuk ranë kambanat”… Ato nuk ranë se nuk mungonte litari. Thjesht dhe shkurt, Dinamo e Zagrebit ishte më e mirë sesa Skënderbeu.”
Duke folur në vijim për AlbanianSport.com, Mneri theksoi se Skënderbeu vuajti sindromën e vjetër të fundit të ndeshjeve. “Sigurisht që, kur ka disnivele të tilla, me sado vështirësi ta mbash peshoren në ekuilibër, vjen një moment që ajo çedon dhe, pastaj, rënia, apo zhbalancimi i krahëve bëhet shumë i shpejtë dhe i frikshëm.”
“Unë, sidoqoftë, do ta konsideroja që ishim me fat që mbaroi ashtu”, – ka përfunduar ish-themeluesi dhe ish-kryeredaktori i të përditshmes sportive shqiptare, “Sport Ekspres”. Takimi i kthimit midis Dinamos së Zagrebit dhe Skënderbeut luhet të martën e ardhshme në kryeqytetin kroat.
