ASNN – Një rritje të numrit të aplikantëve që reflekton rritjen e cilësisë së mësimdhënies e ka cilësuar Ermal Tahiri, drejtori i Shkollës së Mesme të Futbollit “Loro Boriçi”, procesin e përzgjedhjes së kandidatëve për vitin e ri shkollor, ku për 35 vende konkurruan 150 nxënës. Edhe trajneri i Kombëtares së Nën-17-vjeçarëve, Xhemal Mustedanagiç, e ka vlerësuar sasinë e prurjeve të reja dhe nivelin gjithnjë e në rritje të talenteve të reja.
Shkolla e Mesme e Futbollit “Loro Boriçi”, ka kryer të hënën përzgjedhjen e kandidatëve për vitin e ri shkollor, ku për 35 vende konkurruan 150 nxënës. Sipas drejtorit Ermal Tahiri, rritja e masivitetit është shoqëruar edhe me rritjen cilësore. “Mund të them se, përtej modestisë, kemi patur një zhvendosje pozitive në kahun e masivitetit, pasi nga 50 aplikantë para 2 vjetësh, vjet kishin 125, ndërsa sivjet kemi 150, pra është e dukshme rritja e interesit”, – ka thënë ai, duke folur për AlbanianSport.com.
“Ndërkohë, nga 50 vend që kishim në dispozicion para dy vjetësh, sivjet kemi vetëm 35, çka tregon se po synojmë rritjen e cilësisë së nxënësve që do të pranojmë, – ka vijuar ish-futbollisti i Dinamos dhe Kombëtares. – Për më tepër, të 3 trajnerët tanë kanë marrë pjesë dhe janë pajisur tashmë me licencën UEFA Pro, që është e nivelit më të lartë, çka u garanton prindërve të nxënësve tanë, se fëmijët e tyre janë në duar të sigurta.
Për të dytin viti radhazi, i pranishëm në këtë proces ka qenë edhe trajneri i Kombëtares shqiptare të Nën-17-vjeçarëve, Xhemal Mustedanagiç, i cili ka vlerësuar sasinë e prurjeve të reja dhe nivelin gjithnjë e në rritje të talenteve të reja, që premtojnë për ekipet kombëtare të të gjitha grupmoshave, çka sipas tij, është reflektuar edhe në nivelin e të rriturve.
