ASNN – Redi Jupi do të jetë trajneri i ri i ekipit kombëtar të Nën-21-vjeçarëve të Shqipërisë dhe Arjan Bellai trajner i ekipit kombëtar të Nën-19-vjeçarëve. Dje paradite në sallën e konferencave të Federatës Shqiptare të Futbollit, Sekretari i Përgjithshëm i këtij institucioni Ilir Shulku, bëri prezantimin e trajnerëve të sapoemëruar të kombëtareve të këtyre grupmoshave. “Falënderoj fillimisht trajnerët paraardhës, për punën e lavdërueshme që kanë kryer në drejtimin e ekipeve kombëtare që kanë drejtuar”, – tha nr. 2 i organizmit që qeveris futbollin shqiptar.
“Altin Lala ka kërkuar të largohet për shkaqe personale dhe me aprovimin e FSHF-së, – vijoi Shulku. – Sidoqoftë, një kampion si Lala është gjithmonë i mirëpritur, në stafet tona.” Më pas Sekretari i Përgjithshëm prezantoi Redi Jupin, si drejtues të stolit të 21-vjeçarëve të Shqipërisë dhe Arjan Bellain si drejtues të stolit së ekipit të Nën-19-vjeçarëve. “Kemi nisur punën menjëherë për të përgatitur dy ndeshjet e radhës, ato kundër Izraelit dhe Portugalisë, – tha Jupi. – Për fat, skuadrën e njoh sepse kam bashkëpunuar me Skënderin (Gegën, trajnerin e mëparshëm).”
“Them se do të jenë ndeshje të vështira, të cilat do të kërkojnë impenjim maksimal, por nuk do të bëjmë ndryshime të mëdha”, – përfundoi trajneri Redi Jupi. Ndërsa Arjan Bellai falenderoi Federatën Shqiptare të Futbollit dhe Presidentin e saj, Armando Duka, për besimin duke shtuar: “Sigurisht, që për skuadrën kam pak gjëra të reja për të thënë, për shkak se e njoh mirë, duke qenë se kam punuar së bashku me Altin Lalën”. “Do të bëjmë më të mirën, me kontingjentin e lojtarëve që kemi në dispozicion”, – ka premtuar trajneri Arjan Bellai.
Ndihmës i trajnerit Redi Jupi tek Nën-21-vjeçarët, do të jetë një prej emrave më të njohur të futbollit shqiptar në vitet 1970-1980, Vasillaq Zëri. Ndërsa ndihmës i trajnerit Arjan Bellai tek Nën-19-vjeçarët, do të jetë një tjetër emër i madh i futbollit në vitet 1980-1990, Sulejman Demollari.
