ASNN – Derbi i Superligës së Zvicrës mes FC Zyrihut dhe Gras’hoperit, i luajtur javën e kaluar, promovoi në kampionatin helmet sulmuesin e talentuar shqiptar Florian Kamberi, shkruan sot “Koha Ditore”.
Kamberi shënoi gol të bukur me kokë në minutën e 93-të për t’i siguruar fitoren 3-2 skuadrës së Gras’hoperit. Dy golat tjerë për këtë klub të madh zviceran i shënoi Shani Tarashaj.
Tarashaj e Kamberi vlerësohen të jenë dy prej shumë futbollistëve të rinj shqiptarë që kanë nisur të promovohen në Superligën e Zvicrës. Në të vërtetë nga ky shtet në dekadën e fundit kanë dalë futbollistët më të mirë shqiptarë.
Ka shumë arsye që vlerësohet të kenë ndikuar që nga Zvicra të dalin shumë futbollistë cilësorë shqiptarë. Një prej tyre është puna e mirë që bëhet në akademitë e klubeve zvicerane.
Por dhe fakti se të rinjtë shqiptarë e kanë rastin të zhvillohen e më pas edhe të dëshmohen në nivelin e të rriturve. I pari lojtar me emër që doli në Zvicër ishte Milaim Rama, që luajti për Zvicrën edhe në evropianin e vitit 2004.
Së fundmi me FC Thunin, Rama tashmë është tërhequr nga futbolli i luajtur, ndërsa, pas tij, emër në futboll prej atyre që nisën e zhvilluan karrierën në Zvicër bënë Valon Behrami dhe Blerim Xhemaili.
Më pas në skenë doli brezi i Xherdan Shaqirit, Granit Xhakës, Pajtim Kasamit, Admir Mehmedit. Nuk vonoi shumë dhe në skenë dolën edhe lojtarë të tjerë të njohur shqiptarë si Shkëlzen Gashi, Taulant Xhaka, Ermir Lenjani, Berat Xhimshiti, Burim Kukeli dhe Naser Aliji.
