ASNN – Partizani është fituesi i trofeut “Kupa Egnatia”, të premten në mbrëmje, në një turne me 3 skuadra, që u luajt së bashku me Teutën dhe italianët e Frosinones në Stadiumin Kombëtar “Qemal Stafa” në kryeqytet. Në përfundim të kësaj veprimtarie, teksa të kuqtë kanë fituar pas 11-metërshave me durrsakët dhe kanë fituar me golin e Raçiçit ndaj Frosinones, Starova, si trajneri i Partizanit do të ishte i kënaqur.

Por ai do të deklaronte se ende nuk e ka fiksuar formacionin titullar me të cilin do të luajë në kampionat. “Ky ishte një turne miqësor në vazhdën e periudhës përgatitore që ne jemi duke bërë në prag të kampionatit, – ka theksuar trajneri i të kuqve kryeqytetas. – Të tilla veprimtari zhvillohen në të gjithë botën dhe qëllimi i tyre është që skuadrat të jenë sa më pranë aktivitetit, apo kampionatit që nis më 22 gusht.”

“Kemi luajtur tri ndeshje dhe jemi në fazën e uljes së ritmit të ngarkesave për të qenë sa më pranë nisjes së kampionatit. Por ende nuk kam vendosur për formacionin e kampionatit, sepse kemi dhe gati dy javë deri në nisjen e garës”, – ka përfunduar trajneri i Partizanit, Sulejman Starova.