Është i pari në baterinë e tij në 50 metra stil i lirë, por në renditjen e përgjithshme mes 120 notarëve është klasifikuar i 35-ti. Sërish në kufijtë e normës së kualifikimit për në “Rio 2016”. Sidni Hoxha, notari më i mirë shqiptar i viteve të fundit, dje i ka bërë të gjithë për vete. Ka konkurruar në Botërorin e Kazanit, që tashmë është drejt fundit, në garën e tij të preferuar atë të 50 metra stil i lirë.
Sepse në të është rekordmen, ashtu sikurse dhe në 100 metra stil i lirë, por mbi të gjitha ka qenë disa herë fitues në garat e Universiteteve të Amerikës. Dhe në fakt, atë që të gjithë specialistët e notit shqiptar e kanë besuar, pasi e dinin që ishte i vetmi që mund ta përfaqësonte këtë sport denjësisht në Kazan, Sidni Hoxha e arriti. 22”93 është koha e tij, teksa në baterinë e tij kualifikuese është i pari.
Si asnjë notar shqiptar. Komentet kanë qenë të shumta nga shqiptarët. E vërteta është se ka qenë pjesëmarrës në Lojërat Olimpike në Pekin më 2008-tën dhe në “Londër 2012”. E tashmë është shumë pranë normës së kualifikimit për Olimpiadën e tij të tretë në “Rio de Zhaneiro 2016”, duke qenë kështu sportisti i dytë pas Luiza Gegës që mund dhe duhet të jetë me normë kualifikimi në Brazil.
E thjesht fare, teksa Klavio Meçe, Noel Borshi, Nikol Merizaj janë munduar të shpalosin vlerat e tyre më të mira, Sidni Hoxha mbetet krenaria e notit shqiptar. Pasi në çdo botëror, sikurse ka ndodhur dhe në Kazan të Rusisë, është mbi të tjerët në rezultatet që ka. I pari në baterinë kualifikuese, i 35-ti mes 120 pjesëmarrësve në 50 metra stil i lirë dhe me kohën pranë normës së kualifikimit për në Olimpiadë.
