ASNN – Sopoti beson tek revanshi i rezultateve pozitive në javët në vijim, edhe pse përballë të shtunën e ardhshme do të ketë një ndër skuadrat më me eksperiencë të grupit të Jugut, atë të Dinamos. Aktualisht gjithçka ecën për së mbari në ekip.

Nuk ka asnjë i dëmtuar, të gjithë janë në një formë fizike shumë të mirë dhe të gjitha këto të bëjnë të besosh se edhe në ndeshjen e radhës me blutë e kryeqytetit Sopotit do të jetë përsëri triumfatore.

“Pas dy javësh kampionat, renditemi në vendin e dytë me pikë të plota. Kjo do të thotë se po bëjmë një punë të mirë dhe jemi në rrugën e duhur. Shpresoj që skuadra të ketë qëndrueshmëri dhe të vazhdojmë kështu”, – është shprehur trajneri Stojku.

Atmosfera në ekip është mjaft pozitive, ndërsa ndeshja me Tiranën i ka shuar të gjithë zërat e lojtarëve të paaktivizuar në ndeshjet e zhvilluara në kampionat, ndërsa ata e kanë kuptuar se titullarët e formacionit janë më të zotë.