ASNN – Takimi i Superkupës së Shqipërisë për vitin 2015, Skënderbeu-Laçi, do të zhvillohet në Stadiumin Kombëtar “Qemal Stafa” në kryeqytet, në datën 12 gusht, në ora ora 20:00.
Kjo është bërë e ditur nga Federata Shqiptare e Futbollit, e cila ka përcaktuar datën, vendin dhe orën në një komunikatë për shtyp. Veç kësaj, FSHF-ja ka njoftuar dhe se “ka marrë masat për organizimin e shitjes së biletave në qytetet Korçë, Laç dhe Tiranë”.
Superkupa e vitit të shkuar u fitua nga Skënderbeu, që mundi në finale ekipin e Flamurtarit me rezultatin 1-0, me golin e Nimagës. Korçarët triumfuan edhe në vitin 2013, pasi mundën pikërisht skuadrën e Laçit.
Ata triumfuan 4-3, pas 11-metërshave, duke qenë se 90 minuta u mbyllën në barazim 1-1. Kurbinasit nuk e kanë fituar kurrë këtë trofe, teksa ekipi që ka më shumë Superkupa është Tirana, që ka edhe rekord, me dhjetë të tilla.
