ASNN – Ndeshja mes Kukësit dhe Legias së Varshavës, e vlefshme për turin e tretë eliminator të Ligës së Evropës, u ndërpre përfundimisht në minutën e 7-të të pjesës së dytë, në kohën kur rezultati i takimit ishte 1-2 për polakët, për shkak se një lojtar i ekipit kundërshtar është goditur me mjete të forta nga tifozët e pranishëm në tribuna.
Ngjarja në këtë ndeshje është pasqyruar menjëherë në mediat polake, të cilat e kanë cilësuar si skandaloze atë që ndodhi në “Qemal Stafa”. “Skandal në Tiranë! Ndeshja ndërpritet pas sulmit me gurë ndaj Duda-s”. Është ky titulli i faqes sportive polake, “Sportowefakty.pl”. Ndërsa në shkrim thuhet se Duda u godit me gurë nga tifozët e Kukësit dhe më pas ka dalë nga fusha e lojës me barelë për shkak të goditjes së marrë.
Mjekët i qepën plagën e shkaktuar nga guri dhe më pas e fashuan lojtarin, i cili ishte i gatshëm për të vazhduar, shkruan me tej kjo faqe në Internet, por ka qenë asistenti i kryesorit, Stefan Klossner, i cili i ka dërguar lojtarët në dhomat e zhveshjes, ku më pas u vendos që ndeshja të mos luhej më tej.
Po ashtu edhe “Sport.se.pl”, shkruan se ndeshja është ndërprerë nga “sjellja skandaloze e tifozëve të skuadrës shqiptare”. Për ta tashmë është e sigurt fitorja në tavolinë e Legias 0-3, madje shtojnë se Kukësi me shumë mundësi do të përjashtohet dhe nuk do ta luajë as ndeshjen e kthimit në Poloni.
Në këtë faqe sportive polake në Internet i është kushtuar rëndësi edhe banderolave në stadium. “Fundi i ndeshjes do të jetë fundi i jetës suaj. Unë nuk jam sllav, unë jam shqiptar”, – është njëri nga mbishkrimet në banderola, të cituara në këtë media. “Sport.se.pl” shkon edhe më tej, kur shkruan se lojtarët e Legias janë ndjerë si në ferr në “Qemal Stafa” nga atmosfera e krijuar nga tifozët vendas.
