ASNN – Shqipëri-Serbi nuk do të luhet në Shkodër, ashtu siç ishte paracaktuar. Ndeshja do të zhvillohet në “Elbasan Arena”. Lajmi është bërë i ditur nga Federata Shqiptare e Futbollit, e cila ka sqaruar se UEFA-s nuk e ka pranuar stadiumin e Shkodrës, për arsye sigurie, pasi nuk është testuar me parë. “Në lidhje me organizimin e ndeshjes eliminatore të Kampionatit Evropian “Francë 2016”, që do të luhet në Shqipëri, FSHF informon se UEFA kërkon siguri të plotë dhe gjykon se ky takim nuk mund të zhvillohet në një stadium, ku luhet për herë të parë”, – ka deklaruar zëdhënësja e shtypit e organizmit që qeveris futbollin në vend, Jona Dervishi.
“Stadiumi “Elbasan Arena”, ka dhënë prova të suksesshme në aspektin e sigurisë dhe mbarëvajtjes së përgjithshme të ndeshjeve”, – ka shtuar ajo. UEFA i ka kërkuar Federatës Shqiptare të Futbollit që stadium i ri të testohet fillimisht me një miqësore të nivelit të lartë, e më pas të vazhdojë normalisht me ndeshjet zyrtare ndërkombëtare “Duke pasur parasysh specifikën e këtij takimi dhe shkallën e lartë emocionale, FSHF e ka marrë parasysh kërkesën e UEFA-s dhe ka vendosur ta organizojë ndeshjen në Elbasan”, – ka vijuar Dervishi.
“Federata deklaron gjithashtu se do të organizojë një miqësore të nivelit të lartë në Shkodër në muajin nëntor, me rastin e përurimit të stadiumit të rikonstruktuar, – ka sqaruar zëdhënësja e FSHF-së. – Ndërkohë Federata Shqiptare e Futbollit ka nisur punën me agjencitë ligjzbatuese për të siguruar plotësisht, ecurinë normale të kësaj ndeshjeje.” Takimi Shqipëri-Serbi do të luhet më 8 tetor 2015. Por pritet që në stadium të mos ketë tifozë serbë. Autoritetet shqiptare do ta shmangin praninë e tyre për shkak të sigurisë, duke reciprokuar kështu edhe atë që ndodhi në prag të ndeshjes së parë të 14 tetorit të vitit të shkuar, ku nuk u lejuan tifozët shqiptarë.
