ASNN – Trajneri i korçarëve Mirel Josa është shprehur i lumtur për fitoren e arritur në Moldavi ndaj Milsamit. Strategu kryeqytetas i bardhekuqve i përgëzoi lojtarët për ndeshjen e zhvilluar, ndërsa theksoi që ishte një fitore historike. “Ishte ndeshje përfikte, – ka thënë ai duke folur në përfundim të sfidës së zhvilluar në Kishinjev. – Nuk pësuam gola, por shënuam dy në portën e kundërshtarit.”
“Jemi shumë pranë historisë dhe duam të vazhdojmë kështu, – ka vijuar Josa. – Për mua asgjë nuk ka mbaruar, sepse janë edhe 90 minuta të tjera. Edhe lojtarët duhet të qëndrojnë me këmbë mbi tokë, pasi rezultate të tilla kemi provuar dhe e dimë çfarë sikletesh kemi hequr më pas. Po ju jap vetëm një shembull kur kam qenë trajner i Tiranës. Kishim fituar ndeshjen e parë ndaj Gomelit në fushë të huaj 0-2 dhe në ndeshjen e kthimit bjellorusët na shënuan shpejt.”
“Fati jonë që ndeshja përfundoi 0-1 për ta, – ka kujtuar kryeqytetasi i stolit korçar. – Futbolli i tillë është, por skuadra ju përgjigj lojës mjaft mirë. Dhe pse në pjesën e parë bëmë ca gabime që janë normale, në të dytën bëmë lojën tonë dhe realizuam. Sidoqoftë, i uroj futbollistët për lojën e mirë që bënë”. Për Salihin trajneri Josa do të deklaronte: “Unë e njoh mirë Salihin, nuk ka nevojë të flasim për të. Po ashtu dhe ju e njihni mjaft mirë.”
“Ai u përkushtua që në ndeshjen e parë qind për qind dhe unë e vlerësoj shumë. Një lojtar që punon për skuadrën dhe jo vetëm shënon, padyshim që duhet vlerësuar”, ka përfunduar trajneri i Skënderbeut, Mirel Josa. Dygolëshi i shkodranit në Kishinjev u ka dhënë shansin kampionëve të Shqipërisë që të hedhin hapin e parë të sigurtë drejt “play-off”-it të Ligës së Kampioneve për të realizuar më pas objektivin minimal të vajtjes në grupet e Ligës së Evropës.
