ASNN – Niveli më i lartë i Kampionati Italian të Futbollit do të nisë më 22 gusht të këtij viti dhe do të përfundojë më 15 maj të vitit të ardhshëm, por sezoni 2015-2016 i Serisë A duket se do ta ndezë garën dhe rivalitetin që në javët e para të tij. Kjo, sepse shorti i hedhur këtë të hënë ka përcaktuar një ndeshje të konsideruar të madhe që në javën e parë, atë që do të luhet në Firence, midis Fiorentinës vendase dhe Milanit, ndërkohë që kampionët në fuqi të Italisë, Juventusi, do të presë në shtëpi Udinezen.
Por dueli i Firences nuk është asgjë, krahasuar me përballjet që na dhuron java e dytë dhe ajo e tretë e Serisë A. Fillimisht është supersfida Roma-Juventus, që vitin e kaluar ishin të dytët dhe të parët respektivisht, ndërsa java e tretë do të ndizet nga derbi i Milanos. Inter-Milan në “San Siro” do të jetë e para mes përballjeve derbi, pasi të tjerat mes dy skuadrave të të njëjtit qytet do të luhen në javën e 7-të, Kievo-Verona, në javën e 12-të, Juventus-Torino, e në të 13-tën, sfida e kryeqytetit Roma-Lacio.
Vetëm në javën e 18-të do të luhet Xhenoa-Sampdoria. Nga ndeshjet e tjera të forta që do të zhvillohen është ajo në javën e 4-t, Napoli-Lacio, dy skuadra që vitin e kaluar luftuan deri në fund për të siguruar biletën e fundit në Ligës së Kampioneve. Napoli do të presë më tej Juventusin në “San Paolo” për javën e gjashtë, kurse vetëm një javë më vonë do të vizitojë Milanin. Java e 8-të dhuron atë që konsiderohej deri pak vite më parë si “derbi i Italisë” ose sfidën mes Interit dhe Juventusit në “San Siro”.
Në javën e 9-të do të përballen Fiorentina me Romën. Juventus-Milan, një duel mes ekipit më të titulluar në Itali dhe atij italian më të suksesshëm në Evropë do të jetë në javën e 13-të, që pasohet një javë më vonë, me sfidën Napoli-Inter. Vetëm në javën e fundit do të luhet përballja mes Romës dhe Milanit, e para në “Olimpiko”, ndërsa për t’i dhënë fund kampionatit në “San Siro”.
Seria A
2015-2016
Ja kalendari i javës së parë:
Empoli – Kievo
Fiorentina – Milan
Frosinone – Torino
Inter – Atalanta
Juventus – Udineze
Lacio-Bolonja
Palermo – Xhenoa
Sampdoria – Karpi
Sasuolo – Napoli
Verona – Roma
