ASNN – Transferimi i Taulant Xhakës te Fiorentina duket se është vetëm çështje kohe. Mediat italianë nuk kanë zbuluar detaje rreth ofertës që mund të bëjë Fiorentina, por duke marrë në konsideratë faktin që trajneri Paulo Souza i njeh mirë cilësitë e Xhakës, pasi e ka patur lojtar teksa drejtonte Bazelin, mesfushori i përfaqësueses kuqezi pritet të zbarkojë shumë shpejt në Itali.
Duket se mesfushori i kombëtares shqiptare, Taulant Xhaka është shumë pranë transferimit te skuadra italiane, Fiorentina. Këmbëngluja e trajnerit të ri të klubit vjollcë, Paulo Souza, i ka bindur drejtuesit për të blerë futbollistin e Bazelit, i cili ka shkëlqyer për skuadrën e tij dhe kombëtaren e Shqipërisë në edicionin aktual të Eliminatoreve të Evropianit 2016.
Nevoja për një lojtar krahu, e ka shtyrë presidencën e Fiorentinës të hedhë hapa konkretë për të siguruar shërbimet e 24-vjeçarit. Mediat italianë nuk kanë zbuluar asnjë detaj rreth ofertës që mund të bëjë Fiorentina, por duke marrë në konsideratë faktin që Souza i njeh mirë cilësitë e Xhakës, pasi e ka ka patur lojtar teksa drejtonte Bazelin, mesfushori i përfaqësueses kuqezi pritet të zbarkojë shumë shpejt në Itali.
Nga maji i 2013 është pjesë e kombëtares kuqezi, teksa është aktivizuar në katër eliminatoret e këtij viti, duke qenë një nga elementët bazë të formacionit të Xhovani De Biazit. Madje ka qenë ky i fundit që ka bërë fushatë personale që Xhaka të zhvendoset në futbollin italian. Sipas trajnerit të Kombëtares, fakti që në krye të Fiorentinës do të jetë Souza, do të bënte më të thjeshtë përshtatjen e Xhakës në futbollin italian.
“Pa dyshim që është gati të luajë në Serinë A”, – pati thënë De Biazi, duke shtuar: “Loja dhe fiziku i tij mund ta shndërrojnë në një blerje shumë të rëndësishme për Fiorentinën apo për ndonjë skuadër tjetër italiane”.
