ASNN – Vendimi i Gjykatës së Arbitrazhit Sportiv (CAS) për t’i dhënë fitoren në tavolinë Shqipërisë për sfidën me Serbinë, e luajtur më 14 tetor në Beograd, praktikisht i ka siguruar kombëtares sonë kualikimin në fazën e “play-off”-it, por me situatën e re të krijuar në Grupin I eliminator, ambiciet e Shqipërisë janë për kualifikim direkt në finalet e “Francë 2016” si e para, por pse jo edhe si e dyta e grupit.
Para këtij vendimi, Shqipëria renditej në vendin e tretë në kuotën e 7 pikëve, me 2 fitore, 1 barazim dhe 1 humbje dhe me një golaverazh të përgjithshëm 4-5, ndërsa me trepikëshin e Lozanës kuqezinjtë shkojnë në kuotën e 10 pikëve, duke u barazuar Danimarkën. Pavarsisht se golaverazhi pozitiv me 7 gola të shënuar dhe 2 të pësuar e duket se e ngjit Shqipërinë në vendin e dytë, sepse danezët kanë një golaverazh më të dobët, nordikët kanë epërsi, sepse rregullorja parashikon që i pari vjen në diskutim rezultati i takimeve direkte.
Danimarka i ka marrë Shqipërisë një barazim 1-1 në “Elbasan Arena” dhe prandaj ka një epërsi të lehtë ndaj kuqezinjve. Më 3 shtator 2015, Shqipëria do të luajë në fushë të huaj, pikërisht me Danimarkën, sfidë që mund të rezultojë vendimtare për kualifikimin direkt të kuqezinjve. Formacioni i De Biazit mund të luajë edhe për barazim në Danimarkë, duke shpresuar në një tjetër rezultat pozitiv në “Elbasan Arena” më 7 shtator ndaj Portugalisë, të cilën Shqipëria e mposhti 1-0 në fushë të huaj në takimim e parë të këtyre eliminatoreve.
Më 8 tetor kuqezinjtë do të presin Serbinë, ndërsa në takimin përmbyllës më 11 tetor do të luajnë në fushë të huaj me Armeninë. Dy ndeshjet e radhës përballë kundërshtarëve direktë si Danimarka dhe Portugalia, do të vendosin fatin e Shqipërisë në këtë grup, ku kuqezinjtë janë pranë një kualifikimi historik.
