ASNN – Xherdan Shaqiri do të vazhdojë karrierën e tij tek Shalke 04-ra. Sulmuesi ka pranuar ofertën për t’u rikthyer në Bundesligë, duke i hapur rrugën transferimit të Perisiçit te Interi. Ndërkohë, Milani shet El-Sharauin tek Monako. Pritet vetëm zyrtarizimi, por e sigurt është që Xherdan Shaqiri do të vazhdojë karrierën e tij te Shalke 04.
Pas shumë tratativash, më në fund sulmuesi me origjinë kosovare ka pranuar ofertën e klubit gjerman që do të paguajë 18 milionë euro për kartonin e tij. Rikthimi i Shaqirit në Bundesligë i ka hapur rrugën transferimit të Ivan Perisiçit tek Interi. I kërkuar me ngulm nga trajneri Roberto Mançini, futbollisti kroat do t’i kushtojë klubit zikaltër 20 milionë euro.
Ishte pikërisht kjo shifër që bindi Volfsburgun të hqë dorë nga shërbimet e një prej mesfushorëve më të fortë të krahut të majtë. Nuk qëndron pas në merkato as Milani. Klubi kuqezi afrohet më shumë me Zlatan Ibrahimoviçin. Madje, sipas mediave italiane marrëveshja mes palëve është arritur për një kontratë 3-vjeçare nga e cila sulmuesi suedez do të fitojë 6 milion euro në sezon bashkë me bonuset.
Kur pritet vetëm që Paris SG-së ta lërë të lirë Ibrahimoviçin, Milani i krijon hapësira në skuadër suedezit, duke shitur Stefan El-Sharauin. Sulmuesi do të transferohet te Monako në kampionatin francez. Zyrtarizimi është vetëm çështje orësh, pasi futbollisti është larguar nga grumbullimi i skuadrës në “Milanelo”. Mediat lokale kanë zbardhur edhe detajet e këtij operacioni në merkato.
Monako do paguajë 16 milionë euro, ndërsa lojtari do të firmosë një kontratë 3-vjeçare. Gjithsesi, goditja e fundit e madhe në merkato vjen nga Mançester Junajtid. Mediat gjermane e bëjnë të sigurt tranferimin e Bastin Shvajnstajgerit, që do të largohet nga Bajerni i Mynihut. Klubi anglez ka bindur kampionët gjermane, duke pranuar të paguajë 20 milionë euro për mesfushorin.
