ASNN – Shqipëria është ngjitur në vendin e 36-të në renditjen e FIFA-s, duke vendosur një rekord të ri, në historinë e futbollit shqiptar. Fitorja 1-0 në miqësoren me Francën, ka qenë vendimtare në marrjen e 98 pikëve dhe kapërcimin e 15 vendeve nga kuqezinjtë, në renditjen e FIFA-s për muajin korrik. Kështu, Kombëtarja shqiptare renditet në vendin e 36-të në renditjen e FIFA-s, pas publikimit të fundit të bërë nga organizmi më i lartë ndërkombëtar i futbollit.
Në renditjen e muajit korrik, të botuar në faqen zyrtare të FIFA-s në Internet, Shqipëria ka arritur pozicionin më të mirë në historinë e futbollit shqiptar, duke u vendosur midis 40 skuadrave më të mira në botë. Vendi i 36-të përbën edhe një rekord për kombëtaren tonë përsa i përket renditjes së FIFA-s, pasi asnjëherë më parë ne nuk jemi pozicionuar në një vend kaq lart. Për këtë ka ndikuar fitorja 1-0 ndaj Francës, që kuqezinjtë arritën në miqësoren e zhvilluar më 13 qershor 2015, në stadiumin “Elbasan Arena”.
Goli i mrekullueshëm i realizuar nga Ergys Kaçe me anë të një goditjeje dënimi i ka dhënë mundësinë kombëtares shqiptare të fitojë për herë të parë në përballjet me Francën. Edhe pse një miqësore, formacioni i trajnerit Xhovani De Biazi ka zhvilluar një ndeshje të mirë duke e vënë në vështirësi Francën e homologut Deshomp. Kjo fitore ka bërë që Shqipëria të kapërcejë 15 vende dhe të marrë 98 pikë më shumë nga muaji i kaluar, duke u pozicionuar tashmë me 722 pikë, në vendin e 36-të.
Ndërkohë që Francës, vendit organizator të finaleve të Kampionatit Evropian të 2016-s, humbja me Shqipërinë i ka kushtuar zbritjen e 13 vendeve më poshtë në renditjen e FIFA-s. Përfaqësuesja franceze tashmë pozicionohet në vendin e 22-të, ndërsa Danimarka është ngjitur në vendin e 24-t. Pozicionin më të mirë nga skuadrat e grupit tonë e ruan Portugalia që ndodhet në vendin e 7-të. Përsa i përket kreut të renditjes, Gjermania, kampionia në fuqi e botës, ka zbritur në vendin e dytë, ndërsa Belgjika në të tretin, duke ia lënë vendin e parë, Argjentinës që luajti në finalen e Kupës së Amerikës.
