ASNN – Kukësi, Laçi dhe Partizani janë 3 skuadrat shqiptare që do të marrin pjesë në turet eliminatore të veprimtarisë së dytë kontinentale të klubeve, Ligës së Evropës. Verilindorët presin në kryeqytet bjellorusët e Torpedos së Zhodinos, Laçi pret në shtëpi azerët e Inter Bakusë, ndërsa Partizanin, që rikthehet pas 7 vjetësh në Kupat e Evropës, gjen përballë norvegjezët e Stromsgodsetit.
Tri ekipet shqiptare që do të marrin pjesë në veprimtarinë e dytë të klubeve të kontinentit, Ligën e Evropës, luajnë sonte ndeshjet e para të turit të parë eliminator. Nënkampionia e Shqipërisë, Kukësi, e cila do të ndeshet në turin e parë me bjellorusët e Torpedos së Zhodinos, e luan sonte, duke nisur nga ora 18:00, në Stadiumin Kombëtar “Qemal Stafa”, takimin e parë, ndërsa ai i kthimit luhet më 9 korrik.
Skuadra verilindore, që ka bërë ndryshime të mëdha, ka zhvilluar një fazë përgatitore serioze në Austri dhe duke më e favorizuara, të paktën në letër, nga shorti i 3 ekipeve shqiptare. Ndërkaq, skuadra e dytë që do të luajë në turin e parë të Ligës së Evropës, Laçi, e ka zhvilluar në Maqedoninë fqinje, në Ohër, fazën përgatitore për duelin e saj me azerët e Inter Bakusë, të cilët i pret në fushën e vet sonte, duke nisur nga ora 17:30, për takimin e parë, ndërsa pas një jave viziton Azerbajxhanin për ndeshjen e kthimit.
Edhe kurbinasit, fitues të sapokurorëzuar të Kupës së Shqipërisë, kanë marrë përforcime dhe synojnë kalimin e turit. Ndërkaq, duket një mision i vështirë kalimi i turit për Partizanin, që, në rikthimin pas 7 vjetësh në Kupat e Evropës, gjen përballë norvegjezët e Stromsgodsetit.
Skuadra e drejtuar nga trajneri Starova, ka bërë disa përforcime cilësore, siç janë sulmuesi Sebino Plaku dhe mbrojtësi kuqezi, Ditmar Bicaj, dhe prej dy ditësh ndodhet në Norvegji, ku sonte do të zbresë në fushën e blertë për t’u ndeshur me vendasit duke nisur nga ora 19:00.
