Edicioni i 11-të i Turneut Ndërkombëtar të Futbollit, të zhvilluar në Kompleksin “Internacional” në Pezë-Helmës, ka nxjerrë fituesit për moshat Nën-11-vjeç, Nën-13-vjeç dhe Nën-15-vjeç. Kinostudio, “El Klasiko” e Vushtrisë së Kosovës dhe “Internacional” ishin përkatësisht ekipet fituese.
Në Kompleksin “Internacional” në Pezë-Helmës, pranë Tiranës, për 5 ditë me radhë, 87 ekipe nga Shqipëria, Kosova, Ballkani dhe Evropa garuan për të nxjerrë fituesit në Turneun Ndërkombëtar të Moshave në futboll. Pas ndeshjeve të luajtura në grupe, është zhvilluar më pas ceremonia përmbyllëse, ku dhjetëra fëmijë janë lauruar me medalje, diploma dhe kupat përkatëse.
Pas përshëndetjeve të përfaqësuesve të Ministrisë së Arsimit dhe Sportit, FSHF-së dhe personaliteteve të ndryshme, drejtuesi i këtij turneu, Idriz Gashi, ka shprehur mirënjohjen për ata që u bënë protagonistë në sloganin e vetë turneut, që ishte “Të gjithë të barabartë”.
Vendi i parë për moshat Nën-11-vjeç ishte për Kinostudion, për moshën Nën-13-vjeç trofeu shkoi në Kosovë, aty ku u shpall fitues skuadra “El Klasiko” e Vushtrisë, ndërsa për moshën Nën-15-vjeç, fitues është Internacional që përfaqësonte edhe vetë këtë kompleks sportiv të ndërtuar pak kohë më parë.
Edicioni i 11-të i këtij turneu ndërkombëtar futbolli, u mundësua nga Shoqata “Vllaznimi”. Të enjten vijon edhe pjesa tjetër e turneut, ku garojnë moshat Nën-17 dhe Nën-19 vjeç.
