ASNN – Futbollisti i Juventusit, Arturo Vidal ka pësuar një aksident të rëndë në Santiago të Kilit. Ai ishte duke u rikthyer në grumbullimin e përfaqësueses pas një dite pushimi të dhënë nga trajneri Sampaoli. Ai dhe bashkëshortja po ktheheshin nga një festë, teksa “Ferrari” i tyre është përplasur me një makinë tjetër.
Në fushë me përfaqësuesen e tij në Kupën e Amerikës po luan mjaft mirë teksa ka shënuar edhe 3 gola në dy ndeshjet e fundit. Por e njëjta gjë nuk mund të thuhet për pjesën jashtë fushës së futbollit për Vidalin. Mesfushori kilian ka mbushur faqet e shtypit të përditshëm amerikano-jugor për një lajm aspak të këndshëm.
Një natë më parë, Vidali, së bashku me bashkëshorten, janë përplasur me makinën e tyre “Ferrari”, ndërsa po ktheheshin nga një lokal superluksoz 50 km nga kryeqyteti i Kilit, Santiago. Në një çast mesfushori i Juventusit ka përplasur “Ferrari”-n e tij me një tjetër makinë dhe ka dalë nga rruga.
Policët rrugorë kanë mbërritur menjëherë në vendin e ngjarjes dhe, pas kontrollit të bërë, kanë gjetur sasi më të lartë alkooli në gjakun e futbollistit, nga norma e lejuar. Ata kanë bërë menjëherë raportin dhe e kanë dërguar mesfushorin kilian menjëherë në rajon. Por duket se edhe në këtë rast, ligjet janë keqpërdorur për interesa të çastit.
Sipas burimeve policore në Santiago, Vidali ka qëndruar në rajonin policor vetëm një natë dhe më pas është lënë i lirë në mëngjes. Kjo sepse, mësohet se, kur po e arrestonin, ai u ka deklaruar policëve që po t’i vinin atij prangat, do të shkelnin me këmbë shanset e përfaqësueses së Kilit në Kupën e Amerikës.
Siç dihet, kjo veprimtari e futbollit kontinental po zhvillohet pikërisht në Kili dhe, sikundër ka ndodhur shpesh në të shkuarën, ajo fitohet në më të shumtën e rasteve nga përfaqësuesja e vendit organizator. Siç duket, fjalët e sulmuesit kilian të Juventusit nuk kanë rënë në vesh të shurdhër.
