Përfaqësuesja kuqezi ka bërë një progres të madh në UEFA dhe FIFA, sidomos pas fitores kundër Francës me rezultatin minimal 1-0, pasi edhe zyrtarisht është në vazon e tretë të FIFA-s. Ajo tashmë do të jetë në të njëjtën vazo me përfaqësueset e mëdha si Polonia, Ukraina, Skocia, Hungaria, Suedia, Irlanda e Veriut, Serbia dhe Greqia.
Në një grup të tillë duket qartë progresi që ka bërë përfaqësuesja jonë, e cila do të ketë mundësinë tashmë të ketë në short dy skuadra më të dobëta (teorikisht) dhe dy më të forta. Pra shanset këtë herë janë shumë më të mira, pasi rriten nga shorti, gjë që mundësohen nga pozicionimi në vazo më të mirë.
Kështu, Shqipëria do të jetë në vazon e tretë në shortin për Eliminatoret e Botërorit 2018. Pritet vetëm zyrtarizimi, por ndarjen paraprake në prag të shortit që do të hidhet në Shën Petërburg më 25 korrik 2015 e ka publikuara e përditshmja britanike “Daily Mail”.
Kombëtarja kuqezi vendoset në vazon e tretë bashkë me skuadra të tjera si Suedia, Ukraina, Skocia, por edhe Serbia dhe Greqia. Kjo do të thotë se në eliminatoret për Botërorin 2018, Shqipëria nuk mund të përballet me këta rivalë historikë. Po ashtu, vazo e tretë është një arritje historike për ekipin shqiptar, të mësuar gjithmonë të gjendet në vazot e fundit sa i përket zonës evropiane.
Shkak për këtë kapërcim të madh janë bërë rezultatet e shkëlqyera që po arrin skuadra e drejtuar nga Xhovani De Biazi, e fundit fitorja 1-0 në miqësoren kundër Francës. Të gjitha këto kanë bërë që përfaqësuesja shqiptare t’i shtojë një tjetër ëndërr tifozëve të saj.
Aktulisht në vendin e tretë të grupit i eliminator dhe me shumë shpresa për të luajtur për herë të parë në finalet e një Kampionati Evropian, skuadra kuqezi mund të shohë më larg edhe në eliminatoret e Botërorit të ardhshëm që do të luhet në Rusi, pasi ndryshe nga e shkuara, vazo e tretë i mundëson asaj kundërshtarë më të dobët.
