ASNN – Me Francën ishte vetëm një miqësore, por mendojnë të mëdhatë e grupit I për të forcuar pozitat e Shqipërisë në vendin e tretë të grupit I eliminator të “Euro 2016”-s. Më saktë mendon Kristiano Ronaldo, i cili i dha i vetëm fitoren 3-2 Portugalisë në fushë të huaj ndaj Armenisë.
Venndasit shënuan të parët me brazilianin e natyralizuar Pizeli. Por shpresat e armenëve për të dalë me pikë nga kjo sfidë u shuan shpejt. Ronaldo barazoi shifrat me 11-metërsh në pjesën e parë. Me rikthimin në fushë, ai plotësoi paraqitjen e tij të shkëlqyer, duke përmbysur rezultatin me dy gola të tjerë.
Sulmuesi i Realit e përshëndeti për herë të dytë rrjetën në minutën e 55-të, ndërsa vetëm tre minuta më pas, vulosi triumfin e Portugalisë. Gjithsesi, portugezët duhet të vuanin deri në fund, pas daljes me karton të kuq të Tiagos, por me një lojtar më shumë Armenia vetëm sa zbuti humbjen me golin e Mkojanit.
Ruan ritmin edhe Danimarka që në shtëpinë e saj likujdoi me rezultatin 2-0 Serbinë. Njeriu i ndeshjes ishte Polsen. Sulmuesi kaloi vendasit në epërsi në minutën e 13-të. Më pas Ager shpërdoroi nga pika e 11-metërshit mundësinë për të dyfishuar shifrat në pjesën e parë.
Gjithsesi me rikthimin në fushë, Danimarka mbylli sfidën me Polsenin që shënoi edhe golin e dytë personal. Pas këtyre ndeshjeve të radhë në eliminatoret e “Euro 2016”-s, Portugalia kryeson renditjen e grupit I me 12 pikë, dy më shumë se ndjekësja më e afërt, Danimarka.
Në vendin e tretë me shtatë pikë renditet Shqipëria që shkëputet nga Serbia dhe Armenia, që mbyllin tabelën e renditjes së Grupit I me nga një pikë pas pesë sfidave të luajtura.
