ASNN – Gramshi është shpallur kampion i Kategorisë së Dytë të Kampionatit Kombëtar të Futbollit, pasi ka triumfuar në finale me rezultatin 3-1 ndaj Korabit, në takimin që u soll për sportdashësit drejtpërdrejt nga Rrjeti i Radio-Televizionit Shqiptar. Niveli i tretë i Kampionatit Kombëtar të Futbollit, që njihet si Kategoria e Dytë, ka luajtur të shtunën në mbrëmje aktin e saj final dhe Gramshi ka triumfuar bindshëm, 3-1 ndaj Korabit, duke marrë edhe titullin simbolik të kampiones së kësaj kategorie.

Në takimin që u luajt në Stadiumin Kombëtar “Qemal Stafa” dhe që u soll për sportdashësit drejtpërdrejt nga Rrjeti i Radio-Televizionit Shqiptar, kjo finale e Kategorisë së Dytë vuri përballë Korabin, që kishte fituar grupin A apo grupin e Jugut, me Gramshin, që fitoi grupin B, apo grupin e Jugut. Dhe ajo që ka vendosur këtë takim ka qeë përvoja e trajnerit kryeqytetas të Gramshit, Luan Metani, skuadra e të cilit ka luajtur e disiplinuar dhe ka kaluar e para në epërsi me anë të golit të shënuar nga kapiteni Ledio Koçi.

Pavarsisht përpjekjeve të dibranëve, që godasin edhe shtyllën e portës kundërshtare, pjesa e parë mbyllet me epërsinë njëgolëshe të Gramshit, që, përkundër rrjedhës së lojës, gjen në pjesën e dytë edhe dy gola të tjerë. Atëherë kur Korabi po kërkonte me ngulm golin e barazimit, janë gramshakët ata që gjenë golin e dytë, me një goditje nga larg, dhe, më pas, edhe golin e tretë, me një kundërsulm të shpejtë. Në fund ka një ngushëllim për dibranët.

Ata e gjejnë golin e vetëm pas një goditjeje 11-metërshi, që fillimisht grushtohet nga portieri i Gramshit, por më pas përcillet në rrjetë nga një tjetër futbollist i Korabit. Mbyllet kështu me rezultatin 3-1 të Gramshit kjo finale e Kategorisë së Dytë, ndërsa kampione e Kategorisë së Parë është shpallur Bylisi, që ka mundur Tërbunin me rezultatin 2-1, në ndeshjen që u luajt në Stadiumin “Elbasan Arena”