… vijon nga dje
Si të gjitha figurat e sportit shqiptar, edhe Emin Lishi nuk mund të bënte ndryshe. Por do të merrej edhe me disiplina të tjera sportive. E një ndër to është boksi, ndërsa për pesë vjet ka stërvitur në Gardën e Republikës, Kreshnik Qaton. Lishi në fakt në rininë e tij është marrë dhe sportin e dorezave, teksa që nga 1958-1964 ka qenë pjesë e Vllaznisë. E më pas trajner e gjyqtar.
Madje si instruktor i përgatitjes fizike, Emin Lishi nga 1965-1978 do të ishte instruktor i përgatitjes fizike në repartet ushtarake të Ministrisë së Mbrojtjes, apo dhe në Shkollën e Bashkuar. Pa harruar që së bashku me një tjetër figurë të boksit shqiptar, si Hamdi Uka, do të ishte pjesë e përgatitjes fizike të kuadrove në Gardën e Republikës nga 1998-2006. Dhe po kështu dhe kryetar i komisionit të gjyqtarëve të Republikës.
Emin Lishi përmendet dhe në sportet e hipizmit, atje ku nga 1970-2009 ka marrë pjesë në veprimtaritë kombëtare dhe ndërkombëtare. Pa thënë që është dhe gjyqtar i Kategorisë së Parë. Megjithatë një tjetër sport që e ka bërë kampion është bilardo, sidomos karamboli dhe disiplina me tre sponte. Ai është katër herë kampion në këto disiplina më 2002-shin, 2005-n, 2008-n dhe 2009-n.
E për rrjedhojë për të gjitha këto arritje, ndërsa kampion në katër disiplina sportive (not, vaterpolo, boks dhe bilardo), Emin Lishi ka marrë Medaljen e Punës. “Ajo që pres tani dhe që do të shënojë kulmin e karrierës sime sportive do të jetë “Mjeshtër i madh i Punës”, të cilën pres të ma akordojë Presidenti i Republikës, Bujar Nishani”. E mund të rrijë dhe të nxirrje gjëra pa fund për Emin Lishin, një personazh që të gjithë në Tiranë e njohin.
Aq më shumë që për disa kohë ka qenë edhe pjesë e klubit bardheblu. “Nuk kishte kurrë xhelozira mes klubeve, sepse disiplinat kanë qenë të ndara dhe ne jemi të kënaqur që edhe pse kundërshtar ne përsëri jemi miq të mirë”, – ka përfunduar rrëfimin e tij Emin Lishi, i cili ka vrapuar menjëherë pranë pishinës së kompleksit “Te Stela”, atje ku vazhdon të merret me moshat e vogla, sepse noti dhe uji janë jeta e tij.
