ASNN – Atletja shqiptare, Luiza Gega, është ngjitur sot në podiumin e garës së 1,500 metrave, të zhvilluar në Pekin, në garën e vlefshme për veprimtarinë e dytë ndërkombëtare të atletikës individuale, të njohur si “Uërlld Çellenxh”. Ky sukses i shqiptares vjen vetëm 5 ditë pasi ajo ka thyer rekordin kombëtar në garën e 1,500 metrave dhe ka siguruar normën olimpike për “Rio 2016”, duke u renditur e 5-ta në botë në stacionin e parë të veprimtarisë më prestigjioze vjetore të atletikës individuale, “Diamond Ligës”.
Duke folur nga Roma, ku ndodhet për çështje pune, trajneri i Gegës, Taulant Stërmasi, është shprehur i kënaqur me atë që sportistja e tij dha në Pekin, si dhe shpreh bindjen se atletja shtatshkurtër tashmë është konfirmuar midis më të mirave në botë në këtë garë. “E ndoqa garën në TV dhe m’u duk një garë shumë mirë”, – ka deklaruar Stërmasi, duke folur ekskluzivisht për AlbanianSport.com.
“Nuk ishte garë për rekord, pasi diskutova edhe me organizatorët, të cilët më informuan se kishte shumë erë gjatës kohë që u zhvillua 1,500-metërshi, – ka vijuar ai. – Sidoqoftë, jam i kënaqur se Luiza s’kishte vrapuar asnjëherë në kufinjtë e 4 minutave dhe 4 sekondave. Vendi i tretë është padyshim i respektueshëm, edhe pse, duke e parë fundin e garës, mund të kishim marrë edhe vendin e dytë.”
“Tani do të bëhemi gati për në Romë, ku më datën 4 qershor 2015 zhvillohet etapa e radhës e “Diamond Ligë”, – ka theksuar trajneri, i cili shpreson që në garën e kryeqytetit italian atletja e tij të jetë në formën e duhur. Megjithatë, ai e ka një shqetësim. “Shpresojmë që udhëtimet dhe garat nuk kanë lodhur shumë Lizën, – ka deklaruar ai, duke folur për AlbanianSport.com.
“Për këtë arsye, është urgjente që të premten në darke të jemi në Dardhë, për stërvitje në lartësi, duke synuar të rikuperojmë atë që kemi humbur, – ka theksuar Stërmasi. Unë jam më tepër i kënaqur që Luiza është stabilizuar shumë më mënyrën se si vrapon dhe nuk e teproj kur them se, hëpërhë, është vërtet në 5-shen e më të mirave në botë. Me mbështetjen e duhet, është e sigurt që jemi në finalen e Olimpiadës “Rio 2016”.
